amiri kaisi kya ye martaba shahi waziri ka

amīrī kaisī kyā ye martaba shāhī vazīrī kā

tū ai ġhāfil shanāsā-e-madārij ho faqīrī kā

na bhāveñge hamāre ba.ad use dilhā-e-be-nisbat

hameñ ik 'umr rovegā mazā dil kī asīrī kā

javānī hañs ke kaaTī ab palak par ashk chamkī hai

jo raat āḳhir huī niklā sitāra sub.h-e-pīrī kā

mire nāloñ ke sunñe se to chup lag jā.egī tujh ko

na rakh āhañg mere saath bulbul ham-safīrī kā

girānā chāhtā hai 'ujab-e-dānish mujh ko rutba se

junūñ aa bhī yahī to vaqt hai ab dast-gīrī kā

sukHan-sanjāñ sāhib-e-dil hai qadr us kī samajhte haiñ

badal hai ye mirā dīvān dīvān-e-nazīrī kā

vo bazm-e-she'r kyā jis meñ na aaveñ hazrat-e-‘rāsikH’

ki aanā un kā aanā hai shifā.ī kā nazīrī kā

amiri kaisi kya ye martaba shahi waziri ka

tu ai ghafil shanasa-e-madarij ho faqiri ka

na bhawenge hamare baad use dilha-e-be-nisbat

hamein ek 'umr rowega maza dil ki asiri ka

jawani hans ke kaTi ab palak par ashk chamki hai

jo raat aaKHir hui nikla sitara subh-e-piri ka

mere nalon ke sunne se to chup lag jaegi tujh ko

na rakh aahang mere sath bulbul ham-safiri ka

girana chahta hai 'ujab-e-danish mujh ko rutba se

junun aa bhi yahi to waqt hai ab dast-giri ka

sukHan-sanjaan sahib-e-dil hai qadr us ki samajhte hain

badal hai ye mera diwan diwan-e-naziri ka

wo bazm-e-she'r kya jis mein na aawen hazrat-e-‘rasikH’

ki aana un ka aana hai shifai ka naziri ka