apni ghurbat se teri shan se Dar lagta hai

apnī ġhurbat se tirī shaan se Dar lagtā hai

aap se husn ke sultān se Dar lagtā hai

jī to chāhtā hai tire 'ishq ko ifshā kar duuñ

terī 'izzat se tirī aan se Dar lagtā hai

diida dānista jo anjān banā baiThā ho

aise nādān se anjān se Dar lagtā hai

rāh-rau rāh-e-mohabbat kā ḳhudā hāfiz ho

is ḳhatarnāk bayābān se Dar lagtā hai

rañg badlegī ye furqat meñ na jaane kyā kyā

ai ḳhudā ab mujhe is jaan se Dar lagtā hai

phir na phir jaa.e kahīñ mujh se 'ināyat kī nazar

us na.e 'ahd se paimān se Dar lagtā hai

daf'atan us ne jo rokā hai jafāoñ se haath

haaye is zūd-pashemān se Dar lagtā hai

qahr kī mujh pe nazar ho ki 'ināyat kī nazar

us but-e-shoḳh kī har shaan se Dar lagtā hai

vo to maa.il ba-karam ho hī ga.e haiñ lekin

mujh ko badle hue nādān se Dar lagtā hai

naam sunte hī mirā mujh se lipaT kar bole

mujh ko us hashr ba-dāmāñ se Dar lagtā hai

ai mohabbat ke parastār sambhal kar chalnā

rāh-e-ulfat meñ har ik aan se Dar lagtā hai

kis qadar paas hai rusvā.ī kā apnī un ko

raah meñ milne se pahchān se Dar lagtā hai

toḌte haiñ vo mirā dil ye sunā kar mujh ko

mujh ko do roz ke mehmān se Dar lagtā hai

baat itnī sī thī pahuñchī kahāñ tak yā rab

aise baḌhte hue tūfān se Dar lagtā hai

us kī rahmat kī koī had hī nahīñ hai 'mushtāq'

apnī hī tañgī-e-dāmāñ se Dar lagtā hai

apni ghurbat se teri shan se Dar lagta hai

aap se husn ke sultan se Dar lagta hai

ji to chahta hai tere 'ishq ko ifsha kar dun

teri 'izzat se teri aan se Dar lagta hai

dida danista jo anjaan bana baiTha ho

aise nadan se anjaan se Dar lagta hai

rah-rau rah-e-mohabbat ka KHuda hafiz ho

is KHatarnak bayaban se Dar lagta hai

rang badlegi ye furqat mein na jaane kya kya

ai KHuda ab mujhe is jaan se Dar lagta hai

phir na phir jae kahin mujh se 'inayat ki nazar

us nae 'ahd se paiman se Dar lagta hai

daf'atan us ne jo roka hai jafaon se hath

haye is zud-pasheman se Dar lagta hai

qahr ki mujh pe nazar ho ki 'inayat ki nazar

us but-e-shoKH ki har shan se Dar lagta hai

wo to mail ba-karam ho hi gae hain lekin

mujh ko badle hue nadan se Dar lagta hai

nam sunte hi mera mujh se lipaT kar bole

mujh ko us hashr ba-daman se Dar lagta hai

ai mohabbat ke parastar sambhal kar chalna

rah-e-ulfat mein har ek aan se Dar lagta hai

kis qadar pas hai ruswai ka apni un ko

rah mein milne se pahchan se Dar lagta hai

toDte hain wo mera dil ye suna kar mujh ko

mujh ko do roz ke mehman se Dar lagta hai

baat itni si thi pahunchi kahan tak ya rab

aise baDhte hue tufan se Dar lagta hai

us ki rahmat ki koi had hi nahin hai 'mushtaq'

apni hi tangi-e-daman se Dar lagta hai