mujhko to tujhse pyar hai pyare

mujh ko to tujh se pyaar hai pyāre

dil to dil jaañ nisār hai pyāre

tū ne āñkhoñ se vo pilā.ī hai

jis kā ab tak ḳhumār hai pyāre

tere aane se aa ga.ī raunaq

goyā tum se bahār hai pyāre

haaye afsos tum mire na hue

chashm-e-tar ashk-bār hai pyāre

terā milnā to ab nahīñ mumkin

maut kā intizār hai pyāre

jāntā huuñ ki merī jānib se

tere dil meñ ġhubār hai pyāre

maiñ ne lenā hai aur kyā tum se

terī sūrat se pyaar hai pyāre

aur maiñ kyā kahūñ ba-juz is ke

dil bahut be-qarār hai pyāre

tū mirā ban na ban ḳhushī terī

tujh ko sab iḳhtiyār hai pyāre

dil jo apnā tujhe banā na sakā

is liye sharmsār hai pyāre

apnā kah de agar mujhe ai jaañ

is meñ kyā tujh ko aar hai pyāre

mujh ko ulfat huī tujhe nafrat

shān-e-parvardigār hai pyāre

zid na kar le sambhāl ab us ko

dil mirā mujh pe baar hai pyāre

tere muñh se nahīñ nahīñ jachtī

kah de haañ mujh ko pyaar hai pyāre

ab tire lab hilāne par apnī

ziist kā inhisār hai pyāre

baat karnā to darkinār rahā

diid bhī nāgavār hai pyāre

tum hī jab āshnā mire na rahe

kaun phir ġham-gusār hai pyāre

apne 'mushtāq' kī ḳhabar liijo

be-ruḳhī kā shikār hai pyāre

qabr-e-'mushtāq' par zarā aao

bebasī kā mazār hai pyāre

mujh ko to tujh se pyar hai pyare

dil to dil jaan nisar hai pyare

tu ne aankhon se wo pilai hai

jis ka ab tak KHumar hai pyare

tere aane se aa gai raunaq

goya tum se bahaar hai pyare

haye afsos tum mere na hue

chashm-e-tar ashk-bar hai pyare

tera milna to ab nahin mumkin

maut ka intizar hai pyare

jaanta hun ki meri jaanib se

tere dil mein ghubar hai pyare

main ne lena hai aur kya tum se

teri surat se pyar hai pyare

aur main kya kahun ba-juz is ke

dil bahut be-qarar hai pyare

tu mera ban na ban KHushi teri

tujh ko sab iKHtiyar hai pyare

dil jo apna tujhe bana na saka

is liye sharmsar hai pyare

apna kah de agar mujhe ai jaan

is mein kya tujh ko aar hai pyare

mujh ko ulfat hui tujhe nafrat

shan-e-parwardigar hai pyare

zid na kar le sambhaal ab us ko

dil mera mujh pe bar hai pyare

tere munh se nahin nahin jachti

kah de han mujh ko pyar hai pyare

ab tere lab hilane par apni

zist ka inhisar hai pyare

baat karna to darkinar raha

did bhi nagawar hai pyare

tum hi jab aashna mere na rahe

kaun phir gham-gusar hai pyare

apne 'mushtaq' ki KHabar lijo

be-ruKHi ka shikar hai pyare

qabr-e-'mushtaq' par zara aao

bebasi ka mazar hai pyare