wo tegh-e-qatl jo hum par uThae baiThe hain

vo teġh-e-qatl jo ham par uThā.e baiThe haiñ

adab se ham bhī vahīñ sar jhukā.e baiThe haiñ

vo mujh se bazm meñ kyuuñ muñh phirā.e baiThe haiñ

raqīb kuchh unheñ paTTī paḌhāye baiThe haiñ

ġharīb-ḳhāna meñ tashrīf lā.iye sāhib

bajā.e farsh ham āñkheñ bichhā.e baiThe haiñ

Thahartā kyuuñ nahīñ mahram tumhāre siina par

ye sar jo husn pe joban uThā.e baiThe haiñ

ḳhudā kā shukr pas-e-marg fātiha ke liye

vo muttasil mere madfan ke aa.e baiThe haiñ

nahīñ hai ġhusl kī hājat hī un ke lāshoñ ko

shahīd-e-teġh jo ḳhuuñ meñ nahā.e baiThe haiñ

nigāh-e-shoḳh udhar kyā phiri idhar abdāl

ham apne dil ko Thagoñ se bachā.e baiThe haiñ

wo tegh-e-qatl jo hum par uThae baiThe hain

adab se hum bhi wahin sar jhukae baiThe hain

wo mujh se bazm mein kyun munh phirae baiThe hain

raqib kuchh unhen paTTi paDhaye baiThe hain

gharib-KHana mein tashrif laiye sahib

bajae farsh hum aankhen bichhae baiThe hain

Thaharta kyun nahin mahram tumhaare sina par

ye sar jo husn pe joban uThae baiThe hain

KHuda ka shukr pas-e-marg fatiha ke liye

wo muttasil mere madfan ke aae baiThe hain

nahin hai ghusl ki hajat hi un ke lashon ko

shahid-e-tegh jo KHun mein nahae baiThe hain

nigah-e-shoKH udhar kya phiri idhar abdal

hum apne dil ko Thagon se bachae baiThe hain