guzashta KHak-nashinon ki yaadgar hun main

guzashta ḳhāk-nashīnoñ kī yādgār huuñ maiñ

miTā huā sā nishān-e-sar-e-mazār huuñ maiñ

ġharīb chāhne vāloñ meñ tere yaar huuñ maiñ

dimāġh arsh pe zāhir meñ ḳhāksār huuñ maiñ

tire karam meñ kamī kuchh nahīñ karīm hai tū

mirā qusūr hai jhūTā ummīd-vār huuñ maiñ

paḌā hai dast-e-ajal mujh pe laakh baar magar

nikal gayā huuñ taḌap kar vo be-qarār huuñ maiñ

kuchh aaj maiñ ne na.ī pī hai hazrat-e-vā.is

azal kā mast purānā sharāb-ḳhvār huuñ maiñ

nigāh-e-garm se mujh ko na dekh ai dozaḳh

ḳhabar nahīñ tujhe kis kā gunāh-gār huuñ maiñ

zamīn-e-qasr-e-salātīñ se aa rahī hai sadā

ki aaj manzil-e-ishrat huuñ kal mazār huuñ maiñ

phir us kī shān-e-karīmī ke hausle dekhe

gunāhgār ye kah de gunāhgār huuñ maiñ

jo mast hosh meñ aane kā qasd karatā hai

pukārtā hai ye saaqī ki hoshiyār huuñ maiñ

vo kushta huuñ ki mirī laash jis taraf guzrī

zamīñ pukār uThī qābil-e-mazār huuñ maiñ

huzūr-e-vasl kī hasrat azal se hai mujh ko

ḳhayāl kījiye kab se umīd-vār huuñ maiñ

ḳhabar nahīñ use rotā huuñ haal par jis ke

udaas sūrat-e-sham.a-e-sar-e-mazār huuñ meñ

shab-e-firāq mirī jaan dil se kahtī hai

taḌap chukā ho agar tū to be-qarār huuñ maiñ

balā.eñ letī hai phir phir ke gard-e-naumīdī

ye kis ke dar par ilāhī umīd-vār huuñ maiñ

vo be-qarār huuñ dekhe agar taḌap merī

qarār bhī ye pukāre ki be-qarār huuñ maiñ

pukārtā hai ye mūbāf us kī choTī kā

ki sab se pīchhe huuñ par choTī kā siñgār huuñ maiñ

baḌe maze se guzartī hai be-ḳhudī meñ 'amīr'

vo din ḳhudā na dikhā.e ki hoshiyār huuñ maiñ

guzashta KHak-nashinon ki yaadgar hun main

miTa hua sa nishan-e-sar-e-mazar hun main

gharib chahne walon mein tere yar hun main

dimagh arsh pe zahir mein KHaksar hun main

tere karam mein kami kuchh nahin karim hai tu

mera qusur hai jhuTa ummid-war hun main

paDa hai dast-e-ajal mujh pe lakh bar magar

nikal gaya hun taDap kar wo be-qarar hun main

kuchh aaj main ne nai pi hai hazrat-e-wais

azal ka mast purana sharab-KHwar hun main

nigah-e-garm se mujh ko na dekh ai dozaKH

KHabar nahin tujhe kis ka gunah-gar hun main

zamin-e-qasr-e-salatin se aa rahi hai sada

ki aaj manzil-e-ishrat hun kal mazar hun main

phir us ki shan-e-karimi ke hausle dekhe

gunahgar ye kah de gunahgar hun main

jo mast hosh mein aane ka qasd karata hai

pukarta hai ye saqi ki hoshiyar hun main

wo kushta hun ki meri lash jis taraf guzri

zamin pukar uThi qabil-e-mazar hun main

huzur-e-wasl ki hasrat azal se hai mujh ko

KHayal kijiye kab se umid-war hun main

KHabar nahin use rota hun haal par jis ke

udas surat-e-shama-e-sar-e-mazar hun mein

shab-e-firaq meri jaan dil se kahti hai

taDap chuka ho agar tu to be-qarar hun main

balaen leti hai phir phir ke gard-e-naumidi

ye kis ke dar par ilahi umid-war hun main

wo be-qarar hun dekhe agar taDap meri

qarar bhi ye pukare ki be-qarar hun main

pukarta hai ye mubaf us ki choTi ka

ki sab se pichhe hun par choTi ka singar hun main

baDe maze se guzarti hai be-KHudi mein 'amir'

wo din KHuda na dikhae ki hoshiyar hun main