samjha hua hun shumi-e-dast-e-du’a ko main

samjhā huā huuñ shūmī-e-dast-e-du’ā ko maiñ

kuchh roz aur dekh rahā huuñ ḳhudā ko maiñ

sābit-qadam rahūñ ki talātum kā saath duuñ

sāhil ke ruḳh to lā na sakūñgā havā ko maiñ

kashtī ḳhudā pe chhoḌ ke baiThā hai mutma.in

dariyā meñ pheñk duuñ na kahīñ nā-ḳhudā ko maiñ

insān huuñ kHatā-e-vafā baḳhsh dījiye

bas kījiye pahuñch to chukā huuñ sazā ko maiñ

matlab-parast dost na aa.e fareb meñ

baiThā rahā liye hue dām-e-vafā ko maiñ

aa ai junūn-e-'ishq kī takmīl-e-zīst ho

toḌūñ tilism kHāna-e-arz-o-samā ko maiñ

samjha hua hun shumi-e-dast-e-du’a ko main

kuchh roz aur dekh raha hun KHuda ko main

sabit-qadam rahun ki talatum ka sath dun

sahil ke ruKH to la na sakunga hawa ko main

kashti KHuda pe chhoD ke baiTha hai mutmain

dariya mein phenk dun na kahin na-KHuda ko main

insan hun kHata-e-wafa baKHsh dijiye

bas kijiye pahunch to chuka hun saza ko main

matlab-parast dost na aae fareb mein

baiTha raha liye hue dam-e-wafa ko main

aa ai junun-e-'ishq ki takmil-e-zist ho

toDun tilism kHana-e-arz-o-sama ko main