ham-nafas is chaman-e-dahr mein kam aate hain

ham-nafas is chaman-e-dahr meñ kam aate haiñ

bū-e-gul se kaho Thahr abhī ham aate haiñ

’āshiqoñ kī sī tujhe taab kahāñ hai ai dost

varna mujh ko bahut andāz-e-sitam aate haiñ

kam nigāhī bhī tirī maslahat-āmez na ho

dil se naale mire lab tak bhī to kam aate haiñ

terī nazroñ meñ to kuchh sahr hai zālim varna

apne qaabū meñ bhī mushkil hī se ham aate haiñ

kyā barahman meñ bhī baaqī na rahī bū-e-vafā

aaj kyuuñ lauT ke kā'be meñ sanam aate haiñ

hai ye insāñ hī vo qibla-e-barhaq ki jise

sajda karne ke liye dair-o-haram aate haiñ

ḳhuub thā un kī tavajjoh kā zamāna 'maikash'

ab to shāyad unheñ ham yaad bhī kam aate haiñ

ham-nafas is chaman-e-dahr mein kam aate hain

bu-e-gul se kaho Thahr abhi hum aate hain

’ashiqon ki si tujhe tab kahan hai ai dost

warna mujh ko bahut andaz-e-sitam aate hain

kam nigahi bhi teri maslahat-amez na ho

dil se nale mere lab tak bhi to kam aate hain

teri nazron mein to kuchh sahr hai zalim warna

apne qabu mein bhi mushkil hi se hum aate hain

kya barahman mein bhi baqi na rahi bu-e-wafa

aaj kyun lauT ke ka'be mein sanam aate hain

hai ye insan hi wo qibla-e-barhaq ki jise

sajda karne ke liye dair-o-haram aate hain

KHub tha un ki tawajjoh ka zamana 'maikash'

ab to shayad unhen hum yaad bhi kam aate hain