hamein kya gham qiyamat mein jo pursish hone wali hai

hameñ kyā ġham qiyāmat meñ jo pursish hone vaalī hai

ki jab vo fitna-gar aayā to phir maidān ḳhālī hai

kudūrat dil kī jo fariyād karne se nikālī hai

vo kahte haiñ mohabbat par hamārī ḳhaak Daalī hai

abhī haiñ bholī-bholī bāteñ un kī ḳhurd-sālī hai

magar chitvan ye kahtī hai qiyāmat hone vaalī hai

hamārī tauba zāhid kī javānī donoñ bekas haiñ

na koī us kā vāris hai na koī us kā vaalī hai

ilāhī kyuuñ ġham-e-furqat falak mujh ko dikhlātā hai

ki maiñ ne hijr-e-jānāñ meñ qasam khāne kī khā lī hai

duā.eñ de rahā huuñ zer-e-marqad apne qātil ko

ḳhudā rakhe use jis ne mirī hasrat nikālī hai

male tū ne kaf-e-afsos pahroñ marg-e-dushman par

ye surḳhī us ke hai hāthoñ meñ yā mehñdī kī laalī hai

shabāb aisā jo ho us se bahār-e-gul ko kyā nisbat

tirī chaḌhtī javānī hai aur us kī Dhalne vaalī hai

bayāñ kī be-vafā.ī jab zamāne kī to vo bole

ajī ham kHuub samjhe saaf tum ne ham pe Daalī hai

dil-e-muztar ko thāme phir rahā huuñ maiñ shab-e-furqat

na mere paañv ḳhālī haiñ na merā haath ḳhālī hai

mujhe ghar kaaTe khātā hai to bistar phāḌe khātā hai

shab-e-furqat meñ kyā sher-e-naistāñ sher-e-qālī hai

huā hai chaar sajdoñ par ye zāhido tum ko

ḳhudā ne kyā tumhār haath jannat bech Daalī hai

uThā liiñ lutf koī din yahāñ phir ham kahāñ phir tum

burā vaqt aane vaalā hai judā.ī hone vaalī hai

kahāñ qismat kahāñ himmat kahāñ tāqat ki maiñ pahuñchūñ

ki manzil ishq kī kuchh 'arsh-e-a.alā se bhī ’aalī hai

bharī haiñ hasrateñ hī hasrateñ us ḳhāna-e-dil meñ

magar dekho to ye phir ghar kā ghar ḳhālī kā ḳhālī hai

ye chāleñ āsmāñ kī kuchh samajh meñ hī nahīñ ātīñ

kisī kī sarfarāzī hai kisī kī pā.emālī hai

lab-e-mo'jiz-numā se gāliyāñ detī haiñ jo hañs kar

mirī tasvīr meñ bhī tum ne goyā jaan Daalī hai

kabhī hai us kī chaukhaT par kabhī hai us ke qadmoñ par

azal se merī peshānī baḌī taqdīr vaalī hai

kyā jaane kahā kyā o sitam-gar raah chaltoñ ne

ḳhafā kyuuñ ho koī bāzār kī gaalī bhī gaalī hai

tirī mahfil meñ tere daaġh ko ham ne nahīñ dekhā

bharī haiñ ġhair aa-ā kar jagah us kī hī ḳhālī hai

vo likheñge tujhe ḳhat kā javāb ai 'dāġh' kyā kahnā

ye tū ne ḳhvāb dekhā hai ki mazmūn-e-ḳhayālī hai

hamein kya gham qiyamat mein jo pursish hone wali hai

ki jab wo fitna-gar aaya to phir maidan KHali hai

kudurat dil ki jo fariyaad karne se nikali hai

wo kahte hain mohabbat par hamari KHak Dali hai

abhi hain bholi-bholi baaten un ki KHurd-sali hai

magar chitwan ye kahti hai qiyamat hone wali hai

hamari tauba zahid ki jawani donon bekas hain

na koi us ka waris hai na koi us ka wali hai

ilahi kyun gham-e-furqat falak mujh ko dikhlata hai

ki main ne hijr-e-jaanan mein qasam khane ki kha li hai

duaen de raha hun zer-e-marqad apne qatil ko

KHuda rakhe use jis ne meri hasrat nikali hai

male tu ne kaf-e-afsos pahron marg-e-dushman par

ye surKHi us ke hai hathon mein ya mehndi ki lali hai

shabab aisa jo ho us se bahaar-e-gul ko kya nisbat

teri chaDhti jawani hai aur us ki Dhalne wali hai

bayan ki be-wafai jab zamane ki to wo bole

aji hum kHub samjhe saf tum ne hum pe Dali hai

dil-e-muztar ko thame phir raha hun main shab-e-furqat

na mere panw KHali hain na mera hath KHali hai

mujhe ghar kaTe khata hai to bistar phaDe khata hai

shab-e-furqat mein kya sher-e-naistan sher-e-qali hai

hua hai chaar sajdon par ye zahido tum ko

KHuda ne kya tumhaar hath jannat bech Dali hai

uTha lin lutf koi din yahan phir hum kahan phir tum

bura waqt aane wala hai judai hone wali hai

kahan qismat kahan himmat kahan taqat ki main pahunchun

ki manzil ishq ki kuchh 'arsh-e-ala se bhi ’ali hai

bhari hain hasraten hi hasraten us KHana-e-dil mein

magar dekho to ye phir ghar ka ghar KHali ka KHali hai

ye chaalen aasman ki kuchh samajh mein hi nahin aatin

kisi ki sarfaraazi hai kisi ki paemali hai

lab-e-mo'jiz-numa se galiyan deti hain jo hans kar

meri taswir mein bhi tum ne goya jaan Dali hai

kabhi hai us ki chaukhaT par kabhi hai us ke qadmon par

azal se meri peshani baDi taqdir wali hai

kya jaane kaha kya o sitam-gar rah chalton ne

KHafa kyun ho koi bazar ki gali bhi gali hai

teri mahfil mein tere dagh ko hum ne nahin dekha

bhari hain ghair aa-a kar jagah us ki hi KHali hai

wo likhenge tujhe KHat ka jawab ai 'dagh' kya kahna

ye tu ne KHwab dekha hai ki mazmun-e-KHayali hai