har ek aashiq nae andaz se qurban-e-qatil tha

har ik 'āshiq na.e andāz se qurbān-e-qātil thā

qatīl-e-teġh-e-be-sar thā shahīd-e-nāz-e-be-dil thā

tarīq-e-'ishq meñ jo jis qadar gum-karda manzil thā

vo bas utnā hī ai dil ḳhizr-e-rah banñe ke qābil thā

hazāroñ zaḳhm khā ke bhī na taḌpā haaye majbūrī

bas ik tasvīr-e-be-tābī sarāpā terā bismil thā

bahar surat thī ik taklīf bīmārī-e-ulfat meñ

mujhe āsān thā marnā magar parhez mushkil thā

dil vārasta hī apnā akelā rah gayā āḳhir

bahut the ham-safar lekin har ik pāband-e-manzil thā

kahāñ phir naġhma-o-sahbā kahāñ phir mutrib-o-sāqī

kisī be-dil ke aate hī digar-gūñ rañg-e-mahfil thā

ḳhudā 'majzūb' ko rakh salāmat us ne chauñkāyā

jise manzil samajh rakhā thā vo ik kHvāb-e-manzil thā

har ek 'ashiq nae andaz se qurban-e-qatil tha

qatil-e-tegh-e-be-sar tha shahid-e-naz-e-be-dil tha

tariq-e-'ishq mein jo jis qadar gum-karda manzil tha

wo bas utna hi ai dil KHizr-e-rah banne ke qabil tha

hazaron zaKHm kha ke bhi na taDpa haye majburi

bas ek taswir-e-be-tabi sarapa tera bismil tha

bahar surat thi ek taklif bimari-e-ulfat mein

mujhe aasan tha marna magar parhez mushkil tha

dil warasta hi apna akela rah gaya aaKHir

bahut the ham-safar lekin har ek paband-e-manzil tha

kahan phir naghma-o-sahba kahan phir mutrib-o-saqi

kisi be-dil ke aate hi digar-gun rang-e-mahfil tha

KHuda 'majzub' ko rakh salamat us ne chaunkaya

jise manzil samajh rakha tha wo ek kHwab-e-manzil tha