kaise chhupaun raaz-e-gham dida-e-tar ko kya karun

kaise chhupā.ūñ rāz-e-ġham dīda-e-tar ko kyā karūñ

dil kī tapish ko kyā karūñ soz-e-jigar ko kyā karūñ

ġhair hai garche ham-nashīñ bazm meñ hai to vo hasīñ

phir mujhe le chalā vahīñ zauq-e-nazar ko kyā karūñ

shorish-e-'āshiqī kahāñ aur merī sādgī kahāñ

husn ko tere kyā kahūñ apnī nazar ko kyā karūñ

ġham kā na dil meñ ho guzar vasl kī shab ho yuuñ basar

sab ye qubūl hai magar ḳhauf-e-sahar ko kyā karūñ

haal merā thā jab battar tab na huī tumheñ ḳhabar

baa'd mere huā asar ab maiñ asar ko kyā karūñ

dil kī havas miTā to dī un kī jhalak dikhā to dī

par ye kaho ki shauq kī bār-e-digar ko kyā karūñ

'hasrat'-e-naġhz go tirā koī na qadr-dāñ milā

ab ye batā ki maiñ tire 'arz-e-hunar ko kyā karūñ

kaise chhupaun raaz-e-gham dida-e-tar ko kya karun

dil ki tapish ko kya karun soz-e-jigar ko kya karun

ghair hai garche ham-nashin bazm mein hai to wo hasin

phir mujhe le chala wahin zauq-e-nazar ko kya karun

shorish-e-'ashiqi kahan aur meri sadgi kahan

husn ko tere kya kahun apni nazar ko kya karun

gham ka na dil mein ho guzar wasl ki shab ho yun basar

sab ye qubul hai magar KHauf-e-sahar ko kya karun

haal mera tha jab battar tab na hui tumhein KHabar

ba'd mere hua asar ab main asar ko kya karun

dil ki hawas miTa to di un ki jhalak dikha to di

par ye kaho ki shauq ki bar-e-digar ko kya karun

'hasrat'-e-naghz go tera koi na qadr-dan mila

ab ye bata ki main tere 'arz-e-hunar ko kya karun