go hamara hai aashna re sajan

go hamārā hai āshnā re sajan

tū na kar is qadar jafā re sajan

haiñge mushtāq sab chaman ke gul

Tuk tū apnā daras dikhā re sajan

dekh gulshan meñ qad kuuñ sarv-e-buland

kyuuñ na huā aake ḳhāk-e-pā re sajan

har qadam tujh galī meñ 'āshiq kuuñ

haigā maidān-e-karbalā re sajan

ba.ad muddat huā hai roz-e-visāl

Tuk tū bahr-e-ḳhudā na jā re sajan

dekh aa rañg-e-zard 'āshiq kā

gar tū hai tālib-e-tilā re sajan

chīn-e-abrū chaḌhā chalā hai kidhar

Tuk tū apnā patā batā re sajan

ye tavaqqo.a na thī mujhe tujh suuñ

be-sabab kyuuñ tū laḌ chalā re sajan

kahtā 'hātim' phire jahāñ ke biich

tujh sā zālim nahīñ sunā re sajan

go hamara hai aashna re sajan

tu na kar is qadar jafa re sajan

hainge mushtaq sab chaman ke gul

Tuk tu apna daras dikha re sajan

dekh gulshan mein qad kun sarw-e-buland

kyun na hua aake KHak-e-pa re sajan

har qadam tujh gali mein 'ashiq kun

haiga maidan-e-karbala re sajan

baad muddat hua hai roz-e-visal

Tuk tu bahr-e-KHuda na ja re sajan

dekh aa rang-e-zard 'ashiq ka

gar tu hai talib-e-tila re sajan

chin-e-abru chaDha chala hai kidhar

Tuk tu apna pata bata re sajan

ye tawaqqoa na thi mujhe tujh sun

be-sabab kyun tu laD chala re sajan

kahta 'hatim' phire jahan ke bich

tujh sa zalim nahin suna re sajan