hazāroñ ḳhwāhisheñ aisī ki har ḳhwāhish pe dam nikle

hazāroñ ḳhvāhisheñ aisī ki har ḳhvāhish pe dam nikle

bahut nikle mire armān lekin phir bhī kam nikle

Dare kyuuñ merā qātil kyā rahegā us kī gardan par

vo ḳhuuñ jo chashm-e-tar se umr bhar yuuñ dam-ba-dam nikle

nikalnā ḳhuld se aadam kā sunte aa.e haiñ lekin

bahut be-ābrū ho kar tire kūche se ham nikle

bharam khul jaa.e zālim tere qāmat kī darāzī kā

agar is turra-e-pur-pech-o-ḳham kā pech-o-ḳham nikle

magar likhvā.e koī us ko ḳhat to ham se likhvā.e

huī sub.h aur ghar se kaan par rakh kar qalam nikle

huī is daur meñ mansūb mujh se bāda-ashāmī

phir aayā vo zamāna jo jahāñ meñ jām-e-jam nikle

huī jin se tavaqqo ḳhastagī kī daad paane kī

vo ham se bhī ziyāda ḳhasta-e-teġh-e-sitam nikle

mohabbat meñ nahīñ hai farq jiine aur marne kā

usī ko dekh kar jiite haiñ jis kāfir pe dam nikle

kahāñ mai-ḳhāne kā darvāza 'ġhālib' aur kahāñ vaa.iz

par itnā jānte haiñ kal vo jaatā thā ki ham nikle

hazāroñ ḳhwāhisheñ aisī ki har ḳhwāhish pe dam nikle

bahut nikle mere armān lekin phir bhī kam nikle

Dare kyuñ merā qātil kyā rahegā us kī gardan par

wo ḳhuñ jo chashm-e-tar se umr bhar yuñ dam-ba-dam nikle

nikalnā ḳhuld se aadam kā sunte aae haiñ lekin

bahut be-ābrū ho kar tere kūche se hum nikle

bharam khul jae zālim tere qāmat kī darāzī kā

agar is turra-e-pur-pech-o-ḳham kā pech-o-ḳham nikle

magar likhwāe koī us ko ḳhat to hum se likhwāe

huī subh aur ghar se kan par rakh kar qalam nikle

huī is daur meñ mansūb mujh se bāda-ashāmī

phir aayā wo zamāna jo jahāñ meñ jām-e-jam nikle

huī jin se tawaqqo ḳhastagī kī dad pane kī

wo hum se bhī ziyāda ḳhasta-e-teġh-e-sitam nikle

mohabbat meñ nahīñ hai farq jine aur marne kā

usī ko dekh kar jite haiñ jis kāfir pe dam nikle

kahāñ mai-ḳhāne kā darwāza 'ġhālib' aur kahāñ waiz

par itnā jānte haiñ kal wo jatā thā ki hum nikle