hue namwar be-nishan kaise kaise

hue nāmvar be-nishāñ kaise kaise

zamīñ khā ga.ī āsmāñ kaise kaise

tirī bāñkī chitvan ne chun chun ke maare

nukīle sajīle javāñ kaise kaise

na gul haiñ na ġhunche na buuTe na patte

hue baaġh nazr-e-ḳhizāñ kaise kaise

sitāroñ kī dekho bahār aañkh uThā kar

khilātā hai phuul āsmāñ kaise kaise

kaḌe un ke tevar jo maqtal meñ dekhe

liye naaz ne imtihāñ kaise kaise

yahāñ dard se haath siine pe rakhā

vahāñ un ko guzre gumāñ kaise kaise

vo sūrat na āñkhoñ meñ ab hai na dil meñ

makīñ se haiñ ḳhālī makāñ kaise kaise

tire jāñ-nisāroñ ke tevar vahī haiñ

gale par haiñ ḳhanjar ravāñ kaise kaise

jahāñ naam aatā hai un kā zabāñ par

to letī hai bose zabāñ kaise kaise

har ik dil pe haiñ daaġh nākāmiyoñ ke

nishāñ de gayā be-nishāñ kaise kaise

bahār aa ke qudrat kī gulshan meñ dekho

khilātā hai gul bāġhbāñ kaise kaise

uThā.e haiñ majnūñ ne laila kī ḳhātir

shtur-ġhamza-e-sārbāñ kaise kaise

ḳhush-iqbāl kyā sar-zamīn-e-sukHan hai

mile haiñ use bāġhbāñ kaise kaise

javānī kā sadqa zarā aañkh uThāo

taḌapte haiñ dekho javāñ kaise kaise

shab-e-vasl hal hoñge kyā kyā muamme

ayaañ hoñge rāz-e-nihāñ kaise kaise

ḳhizāñ luuT hī le ga.ī baaġh saarā

taḌapte rahe bāġhbāñ kaise kaise

banā kar dikhā.e mere dard-e-dil ne

tah-e-āsmāñ āsmāñ kaise kaise

'amīr' ab madīne ko tū bhī ravāñ ho

chale jaate haiñ kārvāñ kaise kaise

hue namwar be-nishan kaise kaise

zamin kha gai aasman kaise kaise

teri banki chitwan ne chun chun ke mare

nukile sajile jawan kaise kaise

na gul hain na ghunche na buTe na patte

hue bagh nazr-e-KHizan kaise kaise

sitaron ki dekho bahaar aankh uTha kar

khilata hai phul aasman kaise kaise

kaDe un ke tewar jo maqtal mein dekhe

liye naz ne imtihan kaise kaise

yahan dard se hath sine pe rakha

wahan un ko guzre guman kaise kaise

wo surat na aankhon mein ab hai na dil mein

makin se hain KHali makan kaise kaise

tere jaan-nisaron ke tewar wahi hain

gale par hain KHanjar rawan kaise kaise

jahan nam aata hai un ka zaban par

to leti hai bose zaban kaise kaise

har ek dil pe hain dagh nakaamiyon ke

nishan de gaya be-nishan kaise kaise

bahaar aa ke qudrat ki gulshan mein dekho

khilata hai gul baghban kaise kaise

uThae hain majnun ne laila ki KHatir

shtur-ghamza-e-sarban kaise kaise

KHush-iqbaal kya sar-zamin-e-sukHan hai

mile hain use baghban kaise kaise

jawani ka sadqa zara aankh uThao

taDapte hain dekho jawan kaise kaise

shab-e-wasl hal honge kya kya muamme

ayan honge raaz-e-nihan kaise kaise

KHizan luT hi le gai bagh sara

taDapte rahe baghban kaise kaise

bana kar dikhae mere dard-e-dil ne

tah-e-asman aasman kaise kaise

'amir' ab madine ko tu bhi rawan ho

chale jate hain karwan kaise kaise