hum apni sham ko jab nazr-e-jam karte hain

ham apnī shaam ko jab nazr-e-jām karte haiñ

adab se ham ko sitāre salām karte haiñ

gale lagāte haiñ dushman ko bhī surūr meñ ham

bahut bure haiñ magar nek kaam karte haiñ

sajā.eñ kyuuñ na use ye sarā.e hai dil kī

yahāñ hasīn musāfir qayām karte haiñ

hayāt bech deñ thoḌe se pyaar ke badle

ye kārobār bhī tere ġhulām karte haiñ

hameñ to ek nazar se navāz ai saaqī

ham apne hosh-o-ḳhirad tere naam karte haiñ

'qatīl' kitne suḳhan-sāz haiñ ye sannāTe

sukūt-e-shab meñ jo ham se kalām karte haiñ

hum apni sham ko jab nazr-e-jam karte hain

adab se hum ko sitare salam karte hain

gale lagate hain dushman ko bhi surur mein hum

bahut bure hain magar nek kaam karte hain

sajaen kyun na use ye sarae hai dil ki

yahan hasin musafir qayam karte hain

hayat bech den thoDe se pyar ke badle

ye karobar bhi tere ghulam karte hain

hamein to ek nazar se nawaz ai saqi

hum apne hosh-o-KHirad tere nam karte hain

'qatil' kitne suKHan-saz hain ye sannaTe

sukut-e-shab mein jo hum se kalam karte hain