ho gaya labrez mere ishq ka paimana ab

ho gayā labrez mere 'ishq kā paimāna ab

āsmāñ ko chuum legī mahfil-e-rindāna ab

chashm-e-murshid ne pilāyā jām-e-vahdat vo mujhe

jism kī har ḳhvāhishoñ se ho gayā begāna ab

Dor se nisbat kī tum ne guth diye haiñ aise par

ḳhvāb meñ bhī uḌ nahīñ saktā kahīñ parvāna ab

rafta-rafta 'ishq kā aisā nasha chaḌhne lagā

ho gayā andāz merā dekhiye mastāna ab

aap aa.e ḳhvāb meñ aur khul ga.ī qismat merī

ḳhushbuoñ kā ban gayā markaz mirā kāshāna ab

aap ke rauza kī chādar se havā paane ke ba.ad

hosh meñ aane lagā hai aap kā dīvāna ab

aap ne dīdār kī aisī pilā.ī mai use

‘shān’ kā mushkil huā hai hosh meñ aa jaanā ab

ho gaya labrez mere 'ishq ka paimana ab

aasman ko chum legi mahfil-e-rindana ab

chashm-e-murshid ne pilaya jam-e-wahdat wo mujhe

jism ki har KHwahishon se ho gaya begana ab

Dor se nisbat ki tum ne guth diye hain aise par

KHwab mein bhi uD nahin sakta kahin parwana ab

rafta-rafta 'ishq ka aisa nasha chaDhne laga

ho gaya andaz mera dekhiye mastana ab

aap aae KHwab mein aur khul gai qismat meri

KHushbuon ka ban gaya markaz mera kashana ab

aap ke rauza ki chadar se hawa pane ke baad

hosh mein aane laga hai aap ka diwana ab

aap ne didar ki aisi pilai mai use

‘shan’ ka mushkil hua hai hosh mein aa jaana ab