ek umr ho gai ki iqamat safar mein hai

ik umr ho ga.ī ki iqāmat safar meñ hai

naqsha magar vatan kā abhī tak nazar meñ hai

jo ḳhuun ubal chale vo mirī chashm-e-tar meñ hai

jo daaġh rañg laa.e vo merī jigar meñ hai

din raat yaad hai dur-e-dandān yaar kī

kashtī hamārī umr kī āb-e-guhar meñ hai

ham haiñ ba-rañg-e-lāla azal se alam-nasīb

juzv-e-badan hai daaġh jo apne jigar meñ hai

ai bahr-e-husn dekh taḌap intizār kī

machhlī hai mardumak jo mirī chashm-e-tar meñ hai

nairañgiyāñ tasavvur-e-kāmil kī dekhiye

tasvīr-e-yār dil meñ hai naqsha nazar meñ hai

martā hai us pe ġhair bhī to maiñ huuñ be-qarār

dushman ke dil kā daaġh bhī mere jigar meñ hai

duniyā-e-be-sabāt meñ kyā ho hameñ sabāt

jis ghar meñ ham muqīm vo ghar hī safar meñ hai

qātil abhī savār bhī ghar se nahīñ huā

kushtoñ kā Dher chaar taraf rahguzar meñ hai

rakhtā nahīñ zamīn pe maare ḳhushī ke paañv

shāyad javāb-e-ḳhat kamar-e-nāma-bar meñ hai

yā-rab 'amīr' ke bhī gunāhoñ se darguzar

ye bhī to āḳhir ummat-e-kHairul-bashar meñ hai

ek umr ho gai ki iqamat safar mein hai

naqsha magar watan ka abhi tak nazar mein hai

jo KHun ubal chale wo meri chashm-e-tar mein hai

jo dagh rang lae wo meri jigar mein hai

din raat yaad hai dur-e-dandan yar ki

kashti hamari umr ki aab-e-guhar mein hai

hum hain ba-rang-e-lala azal se alam-nasib

juzw-e-badan hai dagh jo apne jigar mein hai

ai bahr-e-husn dekh taDap intizar ki

machhli hai mardumak jo meri chashm-e-tar mein hai

nairangiyan tasawwur-e-kaamil ki dekhiye

taswir-e-yar dil mein hai naqsha nazar mein hai

marta hai us pe ghair bhi to main hun be-qarar

dushman ke dil ka dagh bhi mere jigar mein hai

duniya-e-be-sabaat mein kya ho hamein sabaat

jis ghar mein hum muqim wo ghar hi safar mein hai

qatil abhi sawar bhi ghar se nahin hua

kushton ka Dher chaar taraf rahguzar mein hai

rakhta nahin zamin pe mare KHushi ke panw

shayad jawab-e-KHat kamar-e-nama-bar mein hai

ya-rab 'amir' ke bhi gunahon se darguzar

ye bhi to aaKHir ummat-e-kHairul-bashar mein hai