sath bande ke KHuda tha mujhe malum na tha

saath bande ke ḳhudā thā mujhe ma.alūm na thā

aks hī shaḳhs-numā thā mujhe ma.alūm na thā

nahnu-aqrab kahā dil-dār ne min-habl-e-varīd

vo mere dam se milā thā mujhe ma.alūm na thā

amranī-anfusakum fahm meñ aayā na mere

vo mirī jaañ se lagā thā mujhe ma.alūm na thā

muñh phirātā thā jidhar maiñ thā udhar vajhul-lāh

ruḳh mirā qibla-numā thā mujhe ma.alūm na thā

jab uThā pardae--ġhaflat to huā ye zāhir

ḳhud hī apne meñ ''chhupā thā mujhe ma.alūm na thā

istavā haaye na aayā thā samajh meñ merī

dil mirā arsh-e-ḳhudā thā mujhe ma.alūm na thā

mujhe zulmat meñ huī nuur se aslan na ḳhabar

ḳhaak meñ āb-e-baqā thā mujhe ma.alūm na thā

nafī samjhā thā maiñ jis ko vahī niklā isbāt

vo baqā thā maiñ fanā thā mujhe ma.alūm na thā

jab khulā qaid-e-sar-o-pā se to 'ulvī' ye khulā

aap meñ be-sar-o-pā thā mujhe ma.alūm na thā

sath bande ke KHuda tha mujhe malum na tha

aks hi shaKHs-numa tha mujhe malum na tha

nahnu-aqrab kaha dil-dar ne min-habl-e-warid

wo mere dam se mila tha mujhe malum na tha

amrani-anfusakum fahm mein aaya na mere

wo meri jaan se laga tha mujhe malum na tha

munh phiraata tha jidhar main tha udhar wajhul-lāh

ruKH mera qibla-numa tha mujhe malum na tha

jab uTha pardae--ghaflat to hua ye zahir

KHud hi apne mein chhupa tha mujhe malum na tha

istawa haye na aaya tha samajh mein meri

dil mera arsh-e-KHuda tha mujhe malum na tha

mujhe zulmat mein hui nur se aslan na KHabar

KHak mein aab-e-baqa tha mujhe malum na tha

nafi samjha tha main jis ko wahi nikla isbaat

wo baqa tha main fana tha mujhe malum na tha

jab khula qaid-e-sar-o-pa se to 'ulwi' ye khula

aap mein be-sar-o-pa tha mujhe malum na tha