aankh khulte hi tha ek jalwa nazar ke samne

aañkh khulte hī thā ik jalva nazar ke sāmne

kyā kahūñ maiñ āgayā kyā kyā nazar ke sāmne

aadmī ko dekhā jab hañstā nazar ke sāmne

thā sarāpā nuur kā putlā nazar ke sāmne

aañkh se niklā aur ā-baiThā nazar ke sāmne

chhup gayā nazroñ hī meñ kaisā nazar ke sāmne

dekh le vo jis ko ho chashm-e-basīrat ġhaur se

bahtā hai ik nuur kā dariyā nazar ke sāmne

ham ne jis par jaan dī aur ham ko dī hai jis ne jaañ

dil ke andar hai vo har dam yā nazar ke sāmne

jab muqayyad se sū-e-mutlaq ga.ī apnī nigāh

jo ki paayā thā vo sab khoyā nazar ke sāmne

ab jahāñ meñ kuchh nahīñ hai aarzū 'ulvī' mujhe

marte dam ho sūrat-e-mīrzā nazar ke sāmne

aankh khulte hi tha ek jalwa nazar ke samne

kya kahun main aagaya kya kya nazar ke samne

aadmi ko dekha jab hansta nazar ke samne

tha sarapa nur ka putla nazar ke samne

aankh se nikla aur aa-baiTha nazar ke samne

chhup gaya nazron hi mein kaisa nazar ke samne

dekh le wo jis ko ho chashm-e-basirat ghaur se

bahta hai ek nur ka dariya nazar ke samne

hum ne jis par jaan di aur hum ko di hai jis ne jaan

dil ke andar hai wo har dam ya nazar ke samne

jab muqayyad se su-e-mutlaq gai apni nigah

jo ki paya tha wo sab khoya nazar ke samne

ab jahan mein kuchh nahin hai aarzu 'ulwi' mujhe

marte dam ho surat-e-mirza nazar ke samne