آنکھ کھلتے ہی تھا اک جلوہ نظر کے سامنے

آنکھ کھلتے ہی تھا اک جلوہ نظر کے سامنے

کیا کہوں میں آگیا کیا کیا نظر کے سامنے

آدمی کو دیکھا جب ہنستا نظر کے سامنے

تھا سراپا نور کا پتلا نظر کے سامنے

آنکھ سے نکلا اور آ بیٹھا نظر کے سامنے

چھپ گیا نظروں ہی میں کیسا نظر کے سامنے

دیکھ لے وہ جس کو ہو چشم بصیرت غور سے

بہتا ہے اک نور کا دریا نظر کے سامنے

ہم نے جس پر جان دی اور ہم کو دی ہے جس نے جاں

دل کے اندر ہے وہ ہر دم یا نظر کے سامنے

جب مقید سے سوئے مطلق گئی اپنی نگاہ

جو کہ پایا تھا وہ سب کھویا نظر کے سامنے

اب جہاں میں کچھ نہیں ہے آرزو علویؔ مجھے

مرتے دم ہو صورت میرزا نظر کے سامنے