jahan mein zuhur-e-butan ho raha hai

jahāñ meñ zuhūr-e-butāñ ho rahā hai

nihāñ thā jo kuchh sab ayaañ ho rahā hai

yahāñ har nishāñ be-nishāñ ho rahā hai

makāñ bhī har ik lā-makāñ ho rahā hai

vahāñ jo huā ab yahāñ ho rahā hai

kidhar kā tamāsha kahāñ ho rahā hai

jo sham-e-basīrat ho dekhe har ik dam

fanā hoke har jism jaañ ho rahā hai

ye kyā chiiz hai kuchh ḳhabar bhī hai ġhāfil

har ik dam yuuñ hī rā.egāñ ho rahā hai

azal meñ jo bār-e-amānat uThāyā

har insāñ kā yaañ imtihāñ ho rahā hai

nahīñ khultā sirr-e-adam-e-vaqt murdan

har ik lab bhī qufl-e-dahāñ ho rahā hai

farishtoñ kā kaam ab bashar kar rahe haiñ

ye farsh-e-zamīñ āsmāñ ho rahā hai

ġhazab hai ki bande pe sab ko yaqīñ hai

ḳhudā par faqat ik gumāñ ho rahā hai

dam naza.a 'ulvī' se kyā pūchhte ho

vo jaate haiñ ḳhālī makāñ ho rahā hai

jahan mein zuhur-e-butan ho raha hai

nihan tha jo kuchh sab ayan ho raha hai

yahan har nishan be-nishan ho raha hai

makan bhi har ek la-makan ho raha hai

wahan jo hua ab yahan ho raha hai

kidhar ka tamasha kahan ho raha hai

jo sham-e-basirat ho dekhe har ek dam

fana hoke har jism jaan ho raha hai

ye kya chiz hai kuchh KHabar bhi hai ghafil

har ek dam yun hi raegan ho raha hai

azal mein jo bar-e-amanat uThaya

har insan ka yan imtihan ho raha hai

nahin khulta sirr-e-adam-e-waqt murdan

har ek lab bhi qufl-e-dahan ho raha hai

farishton ka kaam ab bashar kar rahe hain

ye farsh-e-zamin aasman ho raha hai

ghazab hai ki bande pe sab ko yaqin hai

KHuda par faqat ek guman ho raha hai

dam naza 'ulwi' se kya puchhte ho

wo jate hain KHali makan ho raha hai