jalwa jo humne nur mein dekha

jalva jo ham ne nuur meñ dekhā

hū-ba-hū sab zuhūr meñ dekhā

ham ne paayā hai ġhaib meñ jo kuchh

vahī a.alam huzūr meñ dekhā

dekh luuñ aaj vo jo muusā ne

mājrā koh-e-tūr meñ dekhā

asar-e-nasha-e-mai-e-vahdat

sab sharāb-e-tahūr meñ dekhā

tere daure meñ ham ne ai saaqī

jis ko dekhā surūr meñ dekhā

huuñ vo mai-kash ki rū-e-sāqī kā

aks jām-e-billor meñ dekhā

'ulvī' dekhā jo ham ne insāñ meñ

na parī meñ na huur meñ dekhā

jalwa jo hum ne nur mein dekha

hu-ba-hu sab zuhur mein dekha

hum ne paya hai ghaib mein jo kuchh

wahi aalam huzur mein dekha

dekh lun aaj wo jo musa ne

majra koh-e-tur mein dekha

asar-e-nasha-e-mai-e-wahdat

sab sharab-e-tahur mein dekha

tere daure mein hum ne ai saqi

jis ko dekha surur mein dekha

hun wo mai-kash ki ru-e-saqi ka

aks jam-e-billor mein dekha

'ulwi' dekha jo hum ne insan mein

na pari mein na hur mein dekha