fasl-e-gul mein rang masti ka jamana chahiye

fasl-e-gul meñ rañg mastī kā jamānā chāhiye

uTh ke masjid se sū-e-mai-ḳhāna jaanā chāhiye

mujh se hai shauq-e-shahādat kā taqāzā bār-bār

teġh-e-qātil ko gale apne lagānā chāhiye

sun chuke ham vā’iz-e-mimbar-nashīñ se vasf-e-ḳhuld

kūcha-e-mahbūb meñ bistar lagānā chāhiye

fasl-e-gul pahuñchī hai phir aane lage haiñ bāda-ḳhvār

sāqiyā phir jām-e-mai gardish meñ aanā chāhiye

dekh lenā chāhiye vahdat ke jalve kī ziyā

gard-e-kasrat sāhat-e-dil se haTānā chāhiye

mai-kada ho dair ho masjid ho yā gulzār-o-dasht

har jagah us shoḳh harjā.ī ko paanā chāhiye

yuuñ hī ai 'vāqif' ga.ī tiflī javānī haath se

ab to piirī meñ ḳhudā kī yaad aanā chāhiye

fasl-e-gul mein rang masti ka jamana chahiye

uTh ke masjid se su-e-mai-KHana jaana chahiye

mujh se hai shauq-e-shahadat ka taqaza bar-bar

tegh-e-qatil ko gale apne lagana chahiye

sun chuke hum wa’iz-e-mimbar-nashin se wasf-e-KHuld

kucha-e-mahbub mein bistar lagana chahiye

fasl-e-gul pahunchi hai phir aane lage hain baada-KHwar

saqiya phir jam-e-mai gardish mein aana chahiye

dekh lena chahiye wahdat ke jalwe ki ziya

gard-e-kasrat sahat-e-dil se haTana chahiye

mai-kada ho dair ho masjid ho ya gulzar-o-dasht

har jagah us shoKH harjai ko pana chahiye

yun hi ai 'waqif' gai tifli jawani hath se

ab to piri mein KHuda ki yaad aana chahiye