malum nahin ruThe hain kis aaina-ru se

mā'lūm nahīñ rūThe haiñ kis ā.īna-rū se

paanī jo utartā nahīñ ġhunchoñ ke gulo se

kyuuñ kar na lipaT jā.ūñ surāhī ke gulū se

bai'at mujhe phir taaza huī dast-e-subū se

ai hazrat-e-ḳhizr un kā bhalā rauñd sake kaun

sabze jo ugiiñ aap ke us āb-e-vuzū se

nāseh mujhe mat chheḌ ke rakhtā nahīñ hargiz

kuchh chāk-e-garebān-e-sehr kām-e-rafū se

ab koī humā ho to use zab.h kareñ ham

tā'vīz bahut likh chuke hudhud ke lahū se

ho ik sar-e-mū haidar-e-safdar se jise buġhz

al-haq ke vo kāfir hai ahādīs kī rū se

mash'al se koī ġhūl-e-bayābāñ kī jo DhūñDe

to bhī na mileñ shaiḳh jī sāhib se miThū se

hai 'ishq kī vo raah ki ab jis kī badaulat

haiñ baḌh chale chele ka.ī ik apne guru se

kyā ġham hai agar ḳhair nahīñ aañkh laḌātī

ye nargis-e-shahlā to faqīroñ ke kadū se

daulat se tire husn kī ai fitna-e-āfāq

the dost mire jitne vo ban baiThe 'adū se

ab qāfiye bāñdh aur hī andāz ke 'inshā'

hai tujh ko guzarnā sho.arā ke sar-e-kū se

ma'lum nahin ruThe hain kis aaina-ru se

pani jo utarta nahin ghunchon ke gulo se

kyun kar na lipaT jaun surahi ke gulu se

bai'at mujhe phir taza hui dast-e-subu se

ai hazrat-e-KHizr un ka bhala raund sake kaun

sabze jo ugin aap ke us aab-e-wuzu se

naseh mujhe mat chheD ke rakhta nahin hargiz

kuchh chaak-e-gareban-e-sehr kaam-e-rafu se

ab koi huma ho to use zabh karen hum

ta'wiz bahut likh chuke hudhud ke lahu se

ho ek sar-e-mu haidar-e-safdar se jise bughz

al-haq ke wo kafir hai ahadis ki ru se

mash'al se koi ghul-e-bayaban ki jo DhunDe

to bhi na milen shaiKH ji sahib se miThu se

hai 'ishq ki wo rah ki ab jis ki badaulat

hain baDh chale chele kai ek apne guru se

kya gham hai agar KHair nahin aankh laDati

ye nargis-e-shahla to faqiron ke kadu se

daulat se tere husn ki ai fitna-e-afaq

the dost mere jitne wo ban baiThe 'adu se

ab qafiye bandh aur hi andaz ke 'insha'

hai tujh ko guzarna shoara ke sar-e-ku se