معلوم نہیں روٹھے ہیں کس آئینہ رو سے

معلوم نہیں روٹھے ہیں کس آئینہ رو سے

پانی جو اترتا نہیں غنچوں کے گلو سے

کیوں کر نہ لپٹ جاؤں صراحی کے گلو سے

بیعت مجھے پھر تازہ ہوئی دست سبو سے

اے حضرت خضر ان کا بھلا روند سکے کون

سبزے جو اگیں آپ کے اس آب وضو سے

ناصح مجھے مت چھیڑ کہ رکھتا نہیں ہرگز

کچھ چاک‌ گریبان سحر کام رفو سے

اب کوئی ہما ہو تو اسے ذبح کریں ہم

تعویذ بہت لکھ چکے ہدہد کے لہو سے

ہو اک سر مو حیدر صفدر سے جسے بغض

الحق کہ وہ کافر ہے احادیث کی رو سے

مشعل سے کوئی غول بیاباں کی جو ڈھونڈے

تو بھی نہ ملیں شیخ جی صاحب سے مٹھو سے

ہے عشق کی وہ راہ کہ اب جس کی بدولت

ہیں بڑھ چلے چیلے کئی اک اپنے گرو سے

کیا غم ہے اگر خیر نہیں آنکھ لڑاتی

یہ نرگس شہلا تو فقیروں کے کدو سے

دولت سے ترے حسن کی اے فتنۂ آفاق

تھے دوست مرے جتنے وہ بن بیٹھے عدو سے

اب قافیے باندھ اور ہی انداز کے انشاؔ

ہے تجھ کو گزرنا شعرا کے سر کو سے