ishrat-e-qatra hai dariyā meñ fanā ho jaanā

ishrat-e-qatra hai dariyā meñ fanā ho jaanā

dard kā had se guzarnā hai davā ho jaanā

tujh se qismat meñ mirī sūrat-e-qufl-e-abjad

thā likhā baat ke bante hī judā ho jaanā

dil huā kasmakash-e-chāra-e-zehmat meñ tamām

miT gayā ghisne meñ is uqde kā vā ho jaanā

ab jafā se bhī haiñ mahrūm ham allāh allāh

is qadar dushman-e-arbāb-e-vafā ho jaanā

zo.af se girya mubaddal ba-dam-e-sard huā

bāvar aayā hameñ paanī kā havā ho jaanā

dil se miTnā tirī añgusht-e-hinā.ī kā ḳhayāl

ho gayā gosht se nāḳhun kā judā ho jaanā

hai mujhe abr-e-bahārī kā baras kar khulnā

rote rote ġham-e-furqat meñ fanā ho jaanā

gar nahīñ nik.hat-e-gul ko tire kūche kī havas

kyuuñ hai gard-e-rah-e-jaulān-e-sabā ho jaanā

baḳhshe hai jalva-e-gul zauq-e-tamāshā 'ġhālib'

chashm ko chāhiye har rañg meñ vā ho jaanā

tā ki tujh par khule ejāz-e-havā-e-saiqal

dekh barsāt meñ sabz aa.ine kā ho jaanā

ishrat-e-qatra hai dariyā meñ fanā ho jaanā

dard kā had se guzarnā hai dawā ho jaanā

tujh se qismat meñ mirī sūrat-e-qufl-e-abjad

thā likhā baat ke bante hī judā ho jaanā

dil huā kasmakash-e-chāra-e-zehmat meñ tamām

miT gayā ghisne meñ is uqde kā wā ho jaanā

ab jafā se bhī haiñ mahrūm hum allāh allāh

is qadar dushman-e-arbāb-e-wafā ho jaanā

zoaf se girya mubaddal ba-dam-e-sard huā

bāwar aayā hameñ panī kā hawā ho jaanā

dil se miTnā tirī añgusht-e-hināī kā ḳhayāl

ho gayā gosht se nāḳhun kā judā ho jaanā

hai mujhe abr-e-bahārī kā baras kar khulnā

rote rote ġham-e-furqat meñ fanā ho jaanā

gar nahīñ nikhat-e-gul ko tere kūche kī hawas

kyuñ hai gard-e-rah-e-jaulān-e-sabā ho jaanā

baḳhshe hai jalwa-e-gul zauq-e-tamāshā 'ġhālib'

chashm ko chāhiye har rañg meñ wā ho jaanā

tā ki tujh par khule ejāz-e-hawā-e-saiqal

dekh barsāt meñ sabz aaine kā ho jaanā