jab KHayal aaya mujhe tere ruKH-e-pur-nur ka

jab ḳhayāl aayā mujhe tere ruḳh-e-pur-nūr kā

phir gayā naqsha merī āñkhoñ meñ chashm-e-tūr kā

aable paḌne lage pā-e-ḳhayāl-o-fikr meñ

hai ye aalam ātish-e-ġham se dil-e-mahrūr kā

ek nazar meñ jis ne lākhoñ ko kiyā be-hosh-o-mast

dekhne vaalā huuñ maiñ us nargis-e-maḳhmūr kā

juz malāl-o-huzn-o-andoh-o-haras-o-dard-o-ġham

aur koī ab nahīñ monis dil-e-ranjūr kā

faḳhr ye hai maiñ shah-e-'vāris' ke dar kā huuñ faqīr

martaba 'aughat' nahīñ jo qaisar-o-faġhfūr kā

jab KHayal aaya mujhe tere ruKH-e-pur-nur ka

phir gaya naqsha meri aankhon mein chashm-e-tur ka

aable paDne lage pa-e-KHayal-o-fikr mein

hai ye aalam aatish-e-gham se dil-e-mahrur ka

ek nazar mein jis ne lakhon ko kiya be-hosh-o-mast

dekhne wala hun main us nargis-e-maKHmur ka

juz malal-o-huzn-o-andoh-o-haras-o-dard-o-gham

aur koi ab nahin monis dil-e-ranjur ka

faKHr ye hai main shah-e-'waris' ke dar ka hun faqir

martaba 'aughat' nahin jo qaisar-o-faghfur ka