jab se bulbul tune do tinke liye

jab se bulbul tuune do tinke liye

loTtī haiñ bijliyāñ un ke liye

mai na dī qarz us ne do din ke liye

jis ne toḌe ham se gin gin ke liye

din mirā rotā hai merī raat ko

raat rotī hai mirī din ke liye

hai javānī ḳhud javānī kā siñgār

sādgī gahnā hai is sin ke liye

paak rakhā pāk-dāman se hisāb

bū se bhī gin ke diye gin ke liye

kaun vīrāne meñ dekhegā bahār

phuul jañgal meñ khile kin ke liye

saarī duniyā ke haiñ vo mere sivā

maiñ ne duniyā chhoḌ dī jin ke liye

zarra zarra durd-e-mai kā zāhido

dūrbīñ hai chashm-e-bātin ke liye

vasl meñ jhuñjhlā ke vo bole ki haa.e

kin kā joban aur hai kin ke liye

kīmiyā-gar aag sā dekhā nahīñ

taar sone ke diye tinke liye

bāġhbāñ kaliyāñ hoñ halke rañg kī

bhejnā hai ek kamsin ke liye

sab hasīñ haiñ zāhidoñ ko nā-pasand

ab koī huur aa.egī un ke liye

jā.iye sauñpā ḳhudā ko jā.iye

thā ye saarā husn zāmin ke liye

zab.h karne meñ baḌā mashshāq hai

ghar ho maslaḳh meñ muazzin ke liye

vasl kā din aur itnā muḳhtasar

din gine jaate the is din ke liye

khā gayā ham nā-tavānoñ ko firāq

khol kar muñh dev ne tinke liye

sub.h kā sonā jo haath aatā 'amīr'

bhejte tohfa muazzin ke liye

jab se bulbul tune do tinke liye

loTti hain bijliyan un ke liye

mai na di qarz us ne do din ke liye

jis ne toDe hum se gin gin ke liye

din mera rota hai meri raat ko

raat roti hai meri din ke liye

hai jawani KHud jawani ka singar

sadgi gahna hai is sin ke liye

pak rakha pak-daman se hisab

bu se bhi gin ke diye gin ke liye

kaun virane mein dekhega bahaar

phul jangal mein khile kin ke liye

sari duniya ke hain wo mere siwa

main ne duniya chhoD di jin ke liye

zarra zarra durd-e-mai ka zahido

durbin hai chashm-e-baatin ke liye

wasl mein jhunjhla ke wo bole ki hae

kin ka joban aur hai kin ke liye

kimiya-gar aag sa dekha nahin

tar sone ke diye tinke liye

baghban kaliyan hon halke rang ki

bhejna hai ek kamsin ke liye

sab hasin hain zahidon ko na-pasand

ab koi hur aaegi un ke liye

jaiye saunpa KHuda ko jaiye

tha ye sara husn zamin ke liye

zabh karne mein baDa mashshaq hai

ghar ho maslaKH mein muazzin ke liye

wasl ka din aur itna muKHtasar

din gine jate the is din ke liye

kha gaya hum na-tawanon ko firaq

khol kar munh dew ne tinke liye

subh ka sona jo hath aata 'amir'

bhejte tohfa muazzin ke liye