jafa-o-jaur kiya ya wafa hua so hua

jafā-o-jaur kiyā yā vafā huā so huā

huā maiñ raazī jo us kī razā huā so huā

bhalā huā so huā yā burā huā so huā

taraf se yaar ke jo kuchh huā so huā

maiñ chhoḌ tujh ko ai sāhib mire kahāñ jā.ūñ

azal se banda tirā ho gayā huā so huā

qarīb mujh se hai phir kyuuñ nazar se ġhā.eb hai

jamāl apnā to mujh ko dikhā huā so huā

mu'āf kar de ḳhatā dil hai be-qarār mirā

kabhī to siina se apne lagā huā so huā

maiñ dekh zulf ko huuñ kufr kī zalālat meñ

dikhā ke muñh ko musalmān banā huā so huā

madad kisī se to phir chāhtā hai kyā 'kHāmosh'

vasīla tirā 'alī murtazā huā so huā

jafa-o-jaur kiya ya wafa hua so hua

hua main raazi jo us ki raza hua so hua

bhala hua so hua ya bura hua so hua

taraf se yar ke jo kuchh hua so hua

main chhoD tujh ko ai sahib mere kahan jaun

azal se banda tera ho gaya hua so hua

qarib mujh se hai phir kyun nazar se ghaeb hai

jamal apna to mujh ko dikha hua so hua

mu'af kar de KHata dil hai be-qarar mera

kabhi to sina se apne laga hua so hua

main dekh zulf ko hun kufr ki zalalat mein

dikha ke munh ko musalman bana hua so hua

madad kisi se to phir chahta hai kya 'kHamosh'

wasila tera 'ali murtaza hua so hua