jahan sab humne chhan mara hasin-e-yakta tumhin ko dekha

jahān sab ham ne chhān maarā hasīn-e-yaktā tumhīñ ko dekhā

misāl paa.ī har ik hasīñ kī huzūr tum sā tumhīñ ko dekhā

kahīñ jhalak sī tumhārī dekhī kahīñ sarāpā tumhīñ ko dekhā

jidhar nazar kī qasam tumhārī to maiñ ne har-jā tumhīñ ko dekhā

jo naaz se tan ke us ne pūchhā ki tum ne dekhā hai ham se achchhā

to bol uTThā tan ke har bun-e-mū ki tum se achchhā tumhīñ ko dekhā

kahīñ pe mahjūb tum ko paayā kahīñ pe be-parda tum ko dekhā

nazar thī ma.anā meñ bhī tumhīñ par hue jo paidā tumhīñ ko dekhā

hazār minnat pe jān-e-ālam naqāb ulTī to ruḳh se aisī

nigāh laḌāte hī chhup ga.e phir hayā kā putlā tumhīñ ko dekhā

kisī ke dil ko ho mudda.ā tum kisī ke maqsad kisī ke armāñ

samā rahe ho har ik ke dil meñ ye sab kā jumla tumhīñ ko dekhā

tumhārā hai naam sab ke lab par khaTak tumhārī hai sab ke dil meñ

jahāñ ke pyāre tumhīñ ho pyāre jahāñ kā pyārā tumhīñ ko dekhā

agar qiyāmat meñ bhī vo pūchheñ ki merā ham-sar kisī ne dekhā

to sab se pahle ye bol uThūñgā tumhīñ ko dekhā tumhīñ ko dekhā

hazāroñ ġham kī balā.eñ 'ġhausī' jo maiñ ne jhelīñ to yuuñ vo bole

vafā meñ ham ne jo āzmāyā vafā meñ puurā tumhīñ ko dekhā

jahan sab hum ne chhan mara hasin-e-yakta tumhin ko dekha

misal pai har ek hasin ki huzur tum sa tumhin ko dekha

kahin jhalak si tumhaari dekhi kahin sarapa tumhin ko dekha

jidhar nazar ki qasam tumhaari to main ne har-ja tumhin ko dekha

jo naz se tan ke us ne puchha ki tum ne dekha hai hum se achchha

to bol uTTha tan ke har bun-e-mu ki tum se achchha tumhin ko dekha

kahin pe mahjub tum ko paya kahin pe be-parda tum ko dekha

nazar thi mana mein bhi tumhin par hue jo paida tumhin ko dekha

hazar minnat pe jaan-e-alam naqab ulTi to ruKH se aisi

nigah laDate hi chhup gae phir haya ka putla tumhin ko dekha

kisi ke dil ko ho muddaa tum kisi ke maqsad kisi ke arman

sama rahe ho har ek ke dil mein ye sab ka jumla tumhin ko dekha

tumhaara hai nam sab ke lab par khaTak tumhaari hai sab ke dil mein

jahan ke pyare tumhin ho pyare jahan ka pyara tumhin ko dekha

agar qiyamat mein bhi wo puchhen ki mera ham-sar kisi ne dekha

to sab se pahle ye bol uThunga tumhin ko dekha tumhin ko dekha

hazaron gham ki balaen 'ghausi' jo main ne jhelin to yun wo bole

wafa mein hum ne jo aazmaya wafa mein pura tumhin ko dekha