kaleja tham kar jab dil dukhe fariyaad karte hain

kalejā thaam kar jab dil dukhe fariyād karte haiñ

butān-e-sañg-dil us dam ḳhudā ko yaad karte haiñ

taḌapte lauTte haiñ nāla-o-fariyād karte haiñ

ham apne bhūlne vaale ko yuuñ hī yaad karte haiñ

tumhārī be-vafā.ī ham na bhūle haiñ na bhūleñge

diyā hai vo sabaq tum ne ki aksar yaad karte haiñ

zarā milnā zarā khiñchnā zarā narmī zarā garmī

maze le-le ke vo 'ushshāq par be-dād karte haiñ

kise sadma nahīñ rañg-e-chaman kī be-sabātī kā

chaTakte haiñ jo ġhunche asl meñ fariyād karte haiñ

hamārī be-ḳhudī kā haal vo pūchheñ to ai qāsid

ye kahnā hosh itnā hai ki tum ko yaad karte haiñ

bane ma.ashūq jis din se kabhī fursat nahīñ hotī

sitam par vo sitam be-dād par be-dād karte haiñ

'jalīl' āsāñ nahīñ ābād karnā ghar mohabbat kā

ye un kā kaam hai jo zindagī barbād karte haiñ

kaleja tham kar jab dil dukhe fariyaad karte hain

butan-e-sang-dil us dam KHuda ko yaad karte hain

taDapte lauTte hain nala-o-fariyaad karte hain

hum apne bhulne wale ko yun hi yaad karte hain

tumhaari be-wafai hum na bhule hain na bhulenge

diya hai wo sabaq tum ne ki aksar yaad karte hain

zara milna zara khinchna zara narmi zara garmi

maze le-le ke wo 'ushshaq par be-dad karte hain

kise sadma nahin rang-e-chaman ki be-sabaati ka

chaTakte hain jo ghunche asl mein fariyaad karte hain

hamari be-KHudi ka haal wo puchhen to ai qasid

ye kahna hosh itna hai ki tum ko yaad karte hain

bane mashuq jis din se kabhi fursat nahin hoti

sitam par wo sitam be-dad par be-dad karte hain

'jalil' aasan nahin aabaad karna ghar mohabbat ka

ye un ka kaam hai jo zindagi barbaad karte hain