naz bhi hota rahe hui hai be-dad bhi

naaz bhī hotā rahe huī hai be-dād bhī

sab gavāra hai jo tum sunte raho fariyād bhī

sach hai hotī hai burī mazlūm kī fariyād bhī

de ke bulbul ko chhurī phaḌkā kiyā sayyād bhī

vāqa.'ī kyā chiiz hai apnā dil-e-nāshād bhī

zikr-e-haq bhī hotā jaatā hai butoñ kī yaad bhī

tujh se mil kar o but-e-be-dard ye 'uqda khulā

bholī bhālī shakl vaale hote haiñ jallād bhī

ai chaman vaalo chaman se yuuñ guzarnā chāhiye

bāġhbāñ bhī ḳhush rahe raazī rahe sayyād bhī

sādgī hī sādgī mā'shūq meñ achchhī nahīñ

lutf meñ kuchh-kuchh jhalak detī rahe bedād bhī

tum jo kahte ho bigaḌ ke ham na ā.eñge kabhī

ye bhī kah do ab na aa.egī tumhārī yaad bhī

baaġh se jaane kahāñ detā hai ab lālach use

phāñs kar do chaar bulbul phañs gayā sayyād bhī

vaah kyā hasrat-kada dil thā tumhārā ai 'jalīl'

ho gayā do roz meñ ābād bhī barbād bhī

naz bhi hota rahe hui hai be-dad bhi

sab gawara hai jo tum sunte raho fariyaad bhi

sach hai hoti hai buri mazlum ki fariyaad bhi

de ke bulbul ko chhuri phaDka kiya sayyaad bhi

waqa'i kya chiz hai apna dil-e-nashad bhi

zikr-e-haq bhi hota jata hai buton ki yaad bhi

tujh se mil kar o but-e-be-dard ye 'uqda khula

bholi bhaali shakl wale hote hain jallad bhi

ai chaman walo chaman se yun guzarna chahiye

baghban bhi KHush rahe raazi rahe sayyaad bhi

sadgi hi sadgi ma'shuq mein achchhi nahin

lutf mein kuchh-kuchh jhalak deti rahe bedad bhi

tum jo kahte ho bigaD ke hum na aaenge kabhi

ye bhi kah do ab na aaegi tumhaari yaad bhi

bagh se jaane kahan deta hai ab lalach use

phans kar do chaar bulbul phans gaya sayyaad bhi

wah kya hasrat-kada dil tha tumhaara ai 'jalil'

ho gaya do roz mein aabaad bhi barbaad bhi