jalwa-e-yar ne kuchh aisi ada pai hai

jalva-e-yār ne kuchh aisī adā paa.ī hai

har jhalak ek nayā da.vā-e-yaktā.ī hai

mar miTe ham vo abhī mahv-e-ḳhud-ārā.ī hai

us ke qurbān jo kHāmosh-e-tamāshā.ī hai

zaḳhm-e-dil ho ga.e phir unkī ināyat se hare

mere gulshan meñ phir ik taaza bahār aa.ī hai

mai Tapaktī hai nigāhoñ se mere saaqī kī

chashm-e-bad duur ajab mast nazar paa.ī hai

baḌh ga.ī chīn-e-jabīñ se mere dil kī dhaḌkan

unkī ḳhafagī meñ bhī andāz-e-masīhā.ī hai

log muñh-māñgī murādoñ kī duā karte haiñ

ham ne har chiiz talab se bhī sivā paa.ī hai

miT bhī jaa.e ye kahīñ tālib-o-matlūb kā farq

us ke aage na tamannā na tamannā.ī hai

aap ke jitne gile haiñ mere sar āñkhoñ par

baat par baat mujhe bhī koī yaad aa.ī hai

terī ḳhātir kahūñ yā pās-e-adab se maiñ ne

umr-bhar tohmat-e-hastī kī sazā paa.ī hai

ishq meñ chal nahīñ saktī hai samajh buujh kī baat

tere dīvāne ko ab itnī samajh aa.ī hai

aap ke husn kī har vaqt na.ī shaan khulī

jab kabhī dil ne koī choT na.ī khaa.ī hai

aap se mujh ko agar rabt nahīñ hai koī

ye kashish kyā hai yahāñ tak jo mujhe laa.ī hai

do hayātoñ ke hai mābain ajal kā vaqfa

maut sustā.ī huī ziist kī añgḌā.ī hai

apne qadmoñ se judā kar ke tamāsha na banā

terā 'kāmil' tirā banda tirā shaidā.ī hai

jalwa-e-yar ne kuchh aisi ada pai hai

har jhalak ek naya dawa-e-yaktai hai

mar miTe hum wo abhi mahw-e-KHud-arai hai

us ke qurban jo kHamosh-e-tamashai hai

zaKHm-e-dil ho gae phir unki inayat se hare

mere gulshan mein phir ek taza bahaar aai hai

mai Tapakti hai nigahon se mere saqi ki

chashm-e-bad dur ajab mast nazar pai hai

baDh gai chin-e-jabin se mere dil ki dhaDkan

unki KHafagi mein bhi andaz-e-masihai hai

log munh-mangi muradon ki dua karte hain

hum ne har chiz talab se bhi siwa pai hai

miT bhi jae ye kahin talib-o-matlub ka farq

us ke aage na tamanna na tamannai hai

aap ke jitne gile hain mere sar aankhon par

baat par baat mujhe bhi koi yaad aai hai

teri KHatir kahun ya pas-e-adab se main ne

umr-bhar tohmat-e-hasti ki saza pai hai

ishq mein chal nahin sakti hai samajh bujh ki baat

tere diwane ko ab itni samajh aai hai

aap ke husn ki har waqt nai shan khuli

jab kabhi dil ne koi choT nai khai hai

aap se mujh ko agar rabt nahin hai koi

ye kashish kya hai yahan tak jo mujhe lai hai

do hayaton ke hai mabain ajal ka waqfa

maut sustai hui zist ki angDai hai

apne qadmon se juda kar ke tamasha na bana

tera 'kaamil' tera banda tera shaidai hai