husn jaanan ki tarif mumkin nahin

husn jānāñ kī tā'rīf mumkin nahīñ

āfrīñ āfrīñ āfrīñ āfrīñ

tū bhī dekhe agar to kahe ham-nashīñ

āfrīñ āfrīñ āfrīñ āfrīñ

aisā dekhā nahīñ ḳhūbsūrat koī

jism jaise hai ajantā kī mūrat koī

jism naġhma koī jism ḳhushbū koī

jism jaise machaltī huī rāgnī

jism jaise mahaktī huī chāñdnī

jism jaise ki sūraj kī pahlī kiran

jism tarshā huā dil-kash-o-dil-nashīñ

sandalīñ sandalīñ marmarīñ marmarīñ

āfrīñ āfrīñ āfrīñ āfrīñ

chehra ek phuul kī tarh shādāb hai

chehra us kā hai yā koī mahtāb hai

chehra jaise kalī chehra jaise kañval

chehra jaise tasavvur bhī tasvīr bhī

chehra ek ḳhvāb bhī tohrā tā'bīr bhī

chehra koī alf-lailā kī dāstāñ

chehra ik pal yaqīñ chehra ik pal gumāñ

chehra jaise ki chehra kahīñ bhī nahīñ

māhrū-māhrū mah-jabīñ mah-jabīñ

āfrīñ āfrīñ āfrīñ āfrīñ

āñkheñ dekhīñ to maiñ dekhtā rah gayā

jaam donoñ aur donoñ hī do-ātisha

āñkheñ yā mai-kade ke do baab haiñ

āñkheñ un ko kahūñ yā kahūñ ḳhvāb haiñ

āñkheñ nīchī huī to hayā ban ga.iiñ

āñkheñ ūñchī huī to du'ā ban ga.iiñ

āñkheñ uTh kar jhukī to du'ā ban ga.iiñ

āñkheñ jhuk kar uThī to qazā ban ga.iiñ

āñkheñ jin meñ hai āsmān-o-zamīñ

nargisī nargisī surma.ī surma.ī

āfrīñ āfrīñ āfrīñ āfrīñ

zulf-e-jānāñ kī bhī lambī hai dāstāñ

zulf ki mere dil par haiñ parchhā.iyāñ

zulf jaise ki umDī huī ho ghaTā

zulf jaise ki ho koī kaalī balā

zulf uljhe to duniyā pareshān ho

zulf suljhe to ye diid āsān ho

zulf bikhre siyāh raat chhāne lage

zulf lahrā.e to raat jaane lage

zulf zanjīr hai phir bhī kitnī hasīñ

reshmīñ-reshmīñ ’ambarīñ-’ambarīñ

āfrīñ āfrīñ āfrīñ āfrīñ

husn jaanan ki ta'rif mumkin nahin

aafrin aafrin aafrin aafrin

tu bhi dekhe agar to kahe ham-nashin

aafrin aafrin aafrin aafrin

aisa dekha nahin KHubsurat koi

jism jaise hai ajanta ki murat koi

jism naghma koi jism KHushbu koi

jism jaise machalti hui ragni

jism jaise mahakti hui chandni

jism jaise ki suraj ki pahli kiran

jism tarsha hua dil-kash-o-dil-nashin

sandalin sandalin marmarin marmarin

aafrin aafrin aafrin aafrin

chehra ek phul ki tarh shadab hai

chehra us ka hai ya koi mahtab hai

chehra jaise kali chehra jaise kanwal

chehra jaise tasawwur bhi taswir bhi

chehra ek KHwab bhi tohra ta'bir bhi

chehra koi alf-laila ki dastan

chehra ek pal yaqin chehra ek pal guman

chehra jaise ki chehra kahin bhi nahin

mahru-mahru mah-jabin mah-jabin

aafrin aafrin aafrin aafrin

aankhen dekhin to main dekhta rah gaya

jam donon aur donon hi do-atisha

aankhen ya mai-kade ke do bab hain

aankhen un ko kahun ya kahun KHwab hain

aankhen nichi hui to haya ban gain

aankhen unchi hui to du'a ban gain

aankhen uTh kar jhuki to du'a ban gain

aankhen jhuk kar uThi to qaza ban gain

aankhen jin mein hai aasman-o-zamin

nargisi nargisi surmai surmai

aafrin aafrin aafrin aafrin

zulf-e-jaanan ki bhi lambi hai dastan

zulf ki mere dil par hain parchhaiyan

zulf jaise ki umDi hui ho ghaTa

zulf jaise ki ho koi kali bala

zulf uljhe to duniya pareshan ho

zulf suljhe to ye did aasan ho

zulf bikhre siyah raat chhane lage

zulf lahrae to raat jaane lage

zulf zanjir hai phir bhi kitni hasin

reshmin-reshmin ’ambarin-’ambarin

aafrin aafrin aafrin aafrin