rind jo mujhko samajhte hain unhen hosh nahin

riñd jo mujh ko samajhte haiñ unheñ hosh nahīñ

maiñ mai-kada saaz huuñ maiñ mai-kada bardosh nahīñ

kaun sā jalva yahāñ aate hī behosh nahīñ

dil mirā dil hai koī sāġhar-e-sar josh nahīñ

husn se 'ishq judā hai na judā 'ishq se husn

kaun sī shai hai jo āġhosh-dar-āġhosh nahīñ

miT chuke zehn se sab yād-e-guzishta ke nuqūsh

phir bhī ik chiiz hai aisī ki farāmosh nahīñ

kabhī un mad-bharī āñkhoñ se piyā thā ik jaam

aaj tak hosh nahīñ hosh nahīñ hosh nahīñ

'ishq gar husn ke jalvoñ kā hai marhūn-e-karam

husn bhī 'ishq ke ehsāñ se subuk-dosh nahīñ

mahv-e-tasbīh to sab haiñ magar idrāk kahāñ

zindagī ḳhud hī 'ibādat hai magar hosh nahīñ

mil ke ik baar gayā to hai koī jis se 'jigar'

mujh ko ye vahm hai jaise vo har āġhosh nahīñ

rind jo mujh ko samajhte hain unhen hosh nahin

main mai-kada saz hun main mai-kada bardosh nahin

kaun sa jalwa yahan aate hi behosh nahin

dil mera dil hai koi saghar-e-sar josh nahin

husn se 'ishq juda hai na juda 'ishq se husn

kaun si shai hai jo aaghosh-dar-aghosh nahin

miT chuke zehn se sab yaad-e-guzishta ke nuqush

phir bhi ek chiz hai aisi ki faramosh nahin

kabhi un mad-bhari aankhon se piya tha ek jam

aaj tak hosh nahin hosh nahin hosh nahin

'ishq gar husn ke jalwon ka hai marhun-e-karam

husn bhi 'ishq ke ehsan se subuk-dosh nahin

mahw-e-tasbih to sab hain magar idrak kahan

zindagi KHud hi 'ibaadat hai magar hosh nahin

mil ke ek bar gaya to hai koi jis se 'jigar'

mujh ko ye wahm hai jaise wo har aaghosh nahin