jin raaton mein nind uD jati hai kya qahr ki raaten hoti hain

jin rātoñ meñ niiñd uḌ jaatī hai kyā qahr kī rāteñ hotī haiñ

darvāzoñ se Takrā jaate haiñ dīvāroñ se bāteñ hotī haiñ

āshob-e-judā.ī kyā kahiye anhonī bāteñ hotī haiñ

āñkhoñ meñ añdherā chhātā hai jab ujyālī rāteñ hotī haiñ

jab vo nahii. hote pahlū meñ aur lambī rāteñ hotī haiñ

yaad aa ke satātī rahtī hai aur dil se bāteñ hotī haiñ

ghir-ghir ke bādal aate haiñ aur be-barse khul jaate haiñ

ummīdoñ kī jhūTī duniyā meñ sūkhī barsāteñ hotī haiñ

ummīd kā sūraj Duubā hai āñkhoñ meñ añdherā chhāyā hai

duniyā-e-firāq meñ din kaisā rāteñ hī rāteñ hotī haiñ

tai karnā haiñ jhagḌe jiine ke jis tarah bane kahte sunte

bahroñ se bhī paalā paḌtā hai gūñgoñ se bhī bāteñ hotī haiñ

āñkhoñ meñ kahāñ ras kī būñdeñ kuchh hai to lahūñ kī laalī hai

is badlī huī rut meñ ab to ḳhūnīñ barsāteñ hotī haiñ

qismat jaage to ham so.eñ qismat so.e to ham jāgeñ

donoñ hī ko niiñd aa.e jis meñ kab aisī rāteñ hotī haiñ

jo kaan lagā kar sunte haiñ kyā jāneñ rumūz mohabbat ke

ab hoñT nahii. hilne paate haiñ aur pahroñ bāteñ hotī haiñ

hañsne meñ jo aañsū aate haiñ nairañg-e-jahāñ batlāte haiñ

har-ros janāze jaate haiñ har-ros barāteñ hotī haiñ

jo kuchh bhī ḳhushī se hotā hai ye dil kā bojh na ban jaa.e

paimān-e-vafā bhī rahne do sab jhūTī bāteñ hotī haiñ

himmat kis kī hai jo pūchhe ye 'ārzū' saudā.ī se

kyuuñ sāhib āḳhir akele meñ ye kis se bāteñ hotī haiñ

jin raaton mein nind uD jati hai kya qahr ki raaten hoti hain

darwazon se Takra jate hain diwaron se baaten hoti hain

aashob-e-judai kya kahiye anhoni baaten hoti hain

aankhon mein andhera chhata hai jab ujyali raaten hoti hain

jab wo nahi hote pahlu mein aur lambi raaten hoti hain

yaad aa ke satati rahti hai aur dil se baaten hoti hain

ghir-ghir ke baadal aate hain aur be-barse khul jate hain

ummidon ki jhuTi duniya mein sukhi barsaten hoti hain

ummid ka suraj Duba hai aankhon mein andhera chhaya hai

duniya-e-firaq mein din kaisa raaten hi raaten hoti hain

tai karna hain jhagDe jine ke jis tarah bane kahte sunte

bahron se bhi pala paDta hai gungon se bhi baaten hoti hain

aankhon mein kahan ras ki bunden kuchh hai to lahun ki lali hai

is badli hui rut mein ab to KHunin barsaten hoti hain

qismat jage to hum soen qismat soe to hum jagen

donon hi ko nind aae jis mein kab aisi raaten hoti hain

jo kan laga kar sunte hain kya jaanen rumuz mohabbat ke

ab honT nahi hilne pate hain aur pahron baaten hoti hain

hansne mein jo aansu aate hain nairang-e-jahan batlate hain

har-ros janaze jate hain har-ros baraaten hoti hain

jo kuchh bhi KHushi se hota hai ye dil ka bojh na ban jae

paiman-e-wafa bhi rahne do sab jhuTi baaten hoti hain

himmat kis ki hai jo puchhe ye 'arzu' saudai se

kyun sahib aaKHir akele mein ye kis se baaten hoti hain