jis ne koi yusuf koi yaqub banaya

jis ne koī yūsuf koī yāqūb banāyā

us ne mujhe tālib tujhe matlūb banāyā

baḳhshī hai usī ne to mujhe terī mohabbat

pyāre mire jis ne tujhe mahbūb banāyā

ham ko to nazar paḌtī hai sab ḳhūbī isī kī

jis ne tujhe ḳhūboñ meñ bahut kHuub banāyā

kahte ho judā.ī meñ karo sabr hamārī

kyā dil ko mire aap ne ayyūb banāyā

jis din se maiñ chāhā use sharmāne lagā vo

shoḳhī ne mire yaar ko mahjūb banāyā

zāhid ko usī chiiz se duniyā meñ hai nafrat

allāh ne jis chiiz ko marġhūb banāyā

sūrat ko mirī dekh 'turāb' us ne kahā kal

yuuñ 'ishq ne kis ke tujhe majzūb banāyā

jis ne koi yusuf koi yaqub banaya

us ne mujhe talib tujhe matlub banaya

baKHshi hai usi ne to mujhe teri mohabbat

pyare mere jis ne tujhe mahbub banaya

hum ko to nazar paDti hai sab KHubi isi ki

jis ne tujhe KHubon mein bahut kHub banaya

kahte ho judai mein karo sabr hamari

kya dil ko mere aap ne ayyub banaya

jis din se main chaha use sharmane laga wo

shoKHi ne mere yar ko mahjub banaya

zahid ko usi chiz se duniya mein hai nafrat

allah ne jis chiz ko marghub banaya

surat ko meri dekh 'turab' us ne kaha kal

yun 'ishq ne kis ke tujhe majzub banaya