jo jalwa-gah-e-yar hai wo dil yahi to hai

jo jalva-gāh-e-yār hai vo dil yahī to hai

ham jis jagah haiñ husn kī manzil yahī to hai

ḳhud ko na dekhnā hai tujhe dekhne kī shart

jo darmiyāñ hijāb hai haa.il yahī to hai

har zarra dil-fareb hai har jalva jāñ-navāz

har gaam par gumāñ hai ye manzil yahī to hai

halkī sī ek mauj-e-tabassum meñ bah gayā

jo bahar-e-be-kanār thā vo dil yahī to hai

ab har adā-e-husn pe hotā hai ye gumāñ

jo luuT le ga.ī hai mirā dil yahī to hai

dil mujh se kah rahā hai tire dil kī baat bhī

ā.īna ā.īne ke muqābil yahī to hai

donoñ jahāñ ko terī mohabbat meñ bhūlnā

ik baat yaad rakhne ke qābil yahī to hai

ai dosto 'zahīn' ko pahchāntā huuñ maiñ

sab se alag jo sab meñ hai shāmil yahī to hai

jo jalwa-gah-e-yar hai wo dil yahi to hai

hum jis jagah hain husn ki manzil yahi to hai

KHud ko na dekhna hai tujhe dekhne ki shart

jo darmiyan hijab hai hail yahi to hai

har zarra dil-fareb hai har jalwa jaan-nawaz

har gam par guman hai ye manzil yahi to hai

halki si ek mauj-e-tabassum mein bah gaya

jo bahar-e-be-kanar tha wo dil yahi to hai

ab har ada-e-husn pe hota hai ye guman

jo luT le gai hai mera dil yahi to hai

dil mujh se kah raha hai tere dil ki baat bhi

aaina aaine ke muqabil yahi to hai

donon jahan ko teri mohabbat mein bhulna

ek baat yaad rakhne ke qabil yahi to hai

ai dosto 'zahin' ko pahchanta hun main

sab se alag jo sab mein hai shamil yahi to hai