main din-o-dil ishq hun iman-e-tamanna

maiñ dīn-o-dil 'ishq huuñ īmān-e-tamannā

utrā hai mirī ruuh pe qur.ān-e-tamannā

ik harf bhī dhoyā na gayā vaqt se ab tak

kyā baat hai ai kātib-e-dīvān-e-tamannā

jab tak ki mohabbat kī hai duniyā ko zarūrat

dast-e-man dīvāna-o-dāmān-e-tamannā

har shab mirī sarkār meñ aate haiñ farishte

hāthoñ pe liye sham-e’-farozān-e-tamannā

mumkin ho to sirf ek nazar hāl-e-gadā par

ai shaah dil-e-’ālam-o-sultān-e-tamannā

ik 'josh' kā dil hī nahīñ ḳhud go-e-do-'ālam

ġhaltīda hai pesh-e-ḳham chaugān-e-tamannā

main din-o-dil 'ishq hun iman-e-tamanna

utra hai meri ruh pe quran-e-tamanna

ek harf bhi dhoya na gaya waqt se ab tak

kya baat hai ai katib-e-diwan-e-tamanna

jab tak ki mohabbat ki hai duniya ko zarurat

dast-e-man diwana-o-daman-e-tamanna

har shab meri sarkar mein aate hain farishte

hathon pe liye sham-e’-farozan-e-tamanna

mumkin ho to sirf ek nazar haal-e-gada par

ai shah dil-e-’alam-o-sultan-e-tamanna

ek 'josh' ka dil hi nahin KHud go-e-do-'alam

ghaltida hai pesh-e-KHam chaugan-e-tamanna