kabe ka shauq hai na sanam-KHana chahiye

ka.abe kā shauq hai na sanam-ḳhāna chāhiye

jānāna chāhiye dar-e-jānāna chāhiye

sāġhar kī aarzū hai na paimāna chāhiye

bas ik nigāh-e-murshid-e-mai-ḳhāna chāhiye

hāzir haiñ mere jaib-o-garebāñ kī dhajjiyāñ

ab aur kyā tujhe dil-e-dīvāna chāhiye

āshiq na ho to husn kā ghar be-charāġh hai

lailā ko qais sham.a ko parvāna chāhiye

parvarda-e-karam se to zebā nahīñ hijāb

mujh ḳhāna-zād-e-husn se pardā na chāhiye

shikva hai kufr ahl-e-mohabbat ke vāste

har ik jafā-e-dost pe shukrāna chāhiye

bāda-kashoñ ko dete haiñ sāġhar ye pūchh kar

kis ko zakāt-e-nargis-e-mastāna chāhiye

'bedam' namāz-e-ishq yahī hai ḳhudā-gavāh

har-dam tasavvur-e-ruḳh-e-jānāna chāhiye

kabe ka shauq hai na sanam-KHana chahiye

jaanana chahiye dar-e-jaanana chahiye

saghar ki aarzu hai na paimana chahiye

bas ek nigah-e-murshid-e-mai-KHana chahiye

hazir hain mere jaib-o-gareban ki dhajjiyan

ab aur kya tujhe dil-e-diwana chahiye

aashiq na ho to husn ka ghar be-charagh hai

laila ko qais shama ko parwana chahiye

parwarda-e-karam se to zeba nahin hijab

mujh KHana-zad-e-husn se parda na chahiye

shikwa hai kufr ahl-e-mohabbat ke waste

har ek jafa-e-dost pe shukrana chahiye

baada-kashon ko dete hain saghar ye puchh kar

kis ko zakat-e-nargis-e-mastana chahiye

'bedam' namaz-e-ishq yahi hai KHuda-gawah

har-dam tasawwur-e-ruKH-e-jaanana chahiye