hai tu hi jis ne luTa hai sab jaanta hun main

hai tū hī jis ne luuTā hai sab jāntā huuñ maiñ

lākhoñ meñ terī shakl ko pahchāntā huuñ maiñ

hai zindagī visāl tirā maut hai firāq

har do ko sirf terī adā jāntā huuñ maiñ

duniyā ke inqalāb zamāne kī karvaTeñ

shikneñ jabīñ hī kī haiñ tirī jāntā huuñ maiñ

suntā huuñ jo bhī naam samajhtā huuñ terā naam

terā hī ek naam faqat jāntā huuñ maiñ

dīd-e-ḳhudā ke shor se pahuñchā maiñ tere ghar

tere hī āstāñ kā patā jāntā huuñ maiñ

ka.aba thā yā vo but-kada us kī ḳhabar nahīñ

sajda kiyā hai aap ko ye jāntā huuñ maiñ

ai 'kaif' mujh se chhupne kī koshish fuzūl hai

tū kaun hai kahāñ hai ye sab jāntā huuñ maiñ

hai tu hi jis ne luTa hai sab jaanta hun main

lakhon mein teri shakl ko pahchanta hun main

hai zindagi visal tera maut hai firaq

har do ko sirf teri ada jaanta hun main

duniya ke inqalab zamane ki karwaTen

shiknen jabin hi ki hain teri jaanta hun main

sunta hun jo bhi nam samajhta hun tera nam

tera hi ek nam faqat jaanta hun main

did-e-KHuda ke shor se pahuncha main tere ghar

tere hi aastan ka pata jaanta hun main

kaba tha ya wo but-kada us ki KHabar nahin

sajda kiya hai aap ko ye jaanta hun main

ai 'kaif' mujh se chhupne ki koshish fuzul hai

tu kaun hai kahan hai ye sab jaanta hun main