ہے تو ہی جس نے لوٹا ہے سب جانتا ہوں میں

ہے تو ہی جس نے لوٹا ہے سب جانتا ہوں میں

لاکھوں میں تیری شکل کو پہچانتا ہوں میں

ہے زندگی وصال ترا موت ہے فراق

ہر دو کو صرف تیری ادا جانتا ہوں میں

دنیا کے انقلاب زمانے کی کروٹیں

شکنیں جبیں ہی کی ہیں تری جانتا ہوں میں

سنتا ہوں جو بھی نام سمجھتا ہوں تیرا نام

تیرا ہی ایک نام فقط جانتا ہوں میں

دید خدا کے شور سے پہنچا میں تیرے گھر

تیرے ہی آستاں کا پتا جانتا ہوں میں

کعبہ تھا یا وہ بت کدہ اس کی خبر نہیں

سجدہ کیا ہے آپ کو یہ جانتا ہوں میں

اے کیفؔ مجھ سے چھپنے کی کوشش فضول ہے

تو کون ہے کہاں ہے یہ سب جانتا ہوں میں