husn ko hairat se tere dekhta jata hun main

husn ko hairat se tere dekhtā jaatā huuñ maiñ

dekh kar tujh ko ḳhudā ko māntā jaatā huuñ maiñ

tum ḳhayāloñ meñ base ho phir kisī kā kyā ḳhayāl

rafta-rafta kul jahāñ ko bhūltā jaatā huuñ maiñ

is qadar khoyā huuñ chehre ke tasavvur meñ tire

dhīre-dhīre apnī sūrat bhūltā jaatā huuñ maiñ

ḳhauf hai vā'iz kahīñ kāfir na Thahrā de mujhe

chupke-chupke ek but ko pūjtā jaatā huuñ maiñ

dil liyā phir jaan lī īmān bhī chhīnā mirā

luT rahā huuñ bebasī se dekhtā jaatā huuñ maiñ

'ishq kī baazī hai is meñ haar bhī ik jiit hai

jiitā jaatā huuñ jūñ-jūñ hārtā jaatā huuñ maiñ

aañkh ke sāġhar meñ terī ġharq hai saarā jahāñ

aur inhīñ gahrā.iyoñ meñ Dūbtā jaatā huuñ maiñ

khul ga.e asrār sab jab miT ga.ī apnī anā

donoñ 'ālam apne andar dekhtā jaatā huuñ maiñ

chashm-e-sāqī ke asar se ab sarāpā 'kaif' huuñ

be-piye hī har qadam par jhūmtā jaatā huuñ maiñ

husn ko hairat se tere dekhta jata hun main

dekh kar tujh ko KHuda ko manta jata hun main

tum KHayalon mein base ho phir kisi ka kya KHayal

rafta-rafta kul jahan ko bhulta jata hun main

is qadar khoya hun chehre ke tasawwur mein tere

dhire-dhire apni surat bhulta jata hun main

KHauf hai wa'iz kahin kafir na Thahra de mujhe

chupke-chupke ek but ko pujta jata hun main

dil liya phir jaan li iman bhi chhina mera

luT raha hun bebasi se dekhta jata hun main

'ishq ki bazi hai is mein haar bhi ek jit hai

jita jata hun jun-jun haarta jata hun main

aankh ke saghar mein teri gharq hai sara jahan

aur inhin gahraiyon mein Dubta jata hun main

khul gae asrar sab jab miT gai apni ana

donon 'alam apne andar dekhta jata hun main

chashm-e-saqi ke asar se ab sarapa 'kaif' hun

be-piye hi har qadam par jhumta jata hun main