jaise jaise aap KHud ko jaanta jata hun main

jaise jaise aap ḳhud ko jāntā jaatā huuñ maiñ

ḳhud-baḳhud hī aap ko pahchāntā jaatā huuñ maiñ

har daf.a aate haiñ ḳhud hī ik na.e bahrūp meñ

ik tamāshā ho rahā hai dekhtā jaatā huuñ maiñ

jaam hai mai hai subū hai aur saaqī mahv-e-nāz

kul jahāñ ko ġharq-e-mīnā dekhtā jaatā huuñ maiñ

itne tūfānoñ se guzrā huuñ ki 'ādat ho ga.ī

mauj se tūfāñ kī ab to kheltā jaatā huuñ maiñ

hai mire sayyād kī marzī ki muñh se uf na ho

jal rahā hai āshiyāñ aur dekhtā jaatā huuñ maiñ

aap ko maiñ ne jo dekhā aap hī kī aañkh se

kyā batā.ūñ phir ki kyā kyā dekhtā jaatā huuñ maiñ

had nahīñ terī 'atā kī ḳhud mirā dāman hai tañg

tū musalsal de rahā hai māñgtā jaatā huuñ maiñ

huuñ sarāpā ‘kaif’-o-mastī bāda-o-sāġhar baġhair

aap mere rū-ba-rū haiñ dekhtā jaatā huuñ maiñ

jaise jaise aap KHud ko jaanta jata hun main

KHud-baKHud hi aap ko pahchanta jata hun main

har dafa aate hain KHud hi ek nae bahrup mein

ek tamasha ho raha hai dekhta jata hun main

jam hai mai hai subu hai aur saqi mahw-e-naz

kul jahan ko gharq-e-mina dekhta jata hun main

itne tufanon se guzra hun ki 'adat ho gai

mauj se tufan ki ab to khelta jata hun main

hai mere sayyaad ki marzi ki munh se uf na ho

jal raha hai aashiyan aur dekhta jata hun main

aap ko main ne jo dekha aap hi ki aankh se

kya bataun phir ki kya kya dekhta jata hun main

had nahin teri 'ata ki KHud mera daman hai tang

tu musalsal de raha hai mangta jata hun main

hun sarapa ‘kaif’-o-masti baada-o-saghar baghair

aap mere ru-ba-ru hain dekhta jata hun main