aks-e-mahbub hain hum apne parastar hain hum

'aks-e-mahbūb haiñ ham apne parastār haiñ ham

aap ḳhud apnī mohabbat meñ giraftār haiñ ham

koī is gauhar-e-nāyāb kā pursāñ na huā

aa ke bāzār meñ ḳhud apne ḳharīdār haiñ ham

ik na.ī shakl meñ har baar nazar aate haiñ

bazm-e-ālam meñ koī jaise adākār haiñ ham

ḳhud hī ik naqsh banāyā phir hasīñ rañg bhare

ḳhud hī 'āshiq huā naqqāsh vo shahkār haiñ ham

ḳhud ko paane hī pe mauqūf hai tum ko paanā

ye sunā jab se ḳhud apne hī talab-gār haiñ ham

ā.īna dekh ke kah de ki koī tujh sā hai

phir parastish kareñ terī to ḳhatāvār haiñ ham

ham hī markaz haiñ simaT aa.ī hai duniyā ham meñ

mehvar-e-qaus haiñ ham markaz-e-parkār haiñ ham

bojh ziyāda ho agar saath safar mushkil hai

aap ḳhud apne liye ek girāñ-bār haiñ ham

laḌkhaḌā jaa.e vo jo ham ko faqat dekh le 'kaif'

naaz saaqī kare ḳhud jis pe vo mai-ḳhvār haiñ ham

'aks-e-mahbub hain hum apne parastar hain hum

aap KHud apni mohabbat mein giraftar hain hum

koi is gauhar-e-nayab ka pursan na hua

aa ke bazar mein KHud apne KHaridar hain hum

ek nai shakl mein har bar nazar aate hain

bazm-e-alam mein koi jaise adakar hain hum

KHud hi ek naqsh banaya phir hasin rang bhare

KHud hi 'ashiq hua naqqash wo shahkar hain hum

KHud ko pane hi pe mauquf hai tum ko pana

ye suna jab se KHud apne hi talab-gar hain hum

aaina dekh ke kah de ki koi tujh sa hai

phir parastish karen teri to KHatawar hain hum

hum hi markaz hain simaT aai hai duniya hum mein

mehwar-e-qaus hain hum markaz-e-parkar hain hum

bojh ziyaada ho agar sath safar mushkil hai

aap KHud apne liye ek giran-bar hain hum

laDkhaDa jae wo jo hum ko faqat dekh le 'kaif'

naz saqi kare KHud jis pe wo mai-KHwar hain hum