main KHud tha jab tak bhi sath apne kahin bhi manzil nazar na aai

maiñ ḳhud thā jab tak bhī saath apne kahīñ bhī manzil nazar na aa.ī

maiñ kho gayā jab talāsh meñ ḳhud to yaar ko apne pā rahā huuñ

talāsh kis kī hai kaun ġham hai ye sab hijābāt haiñ nazar ke

judā hī kab the kabhī vo mujh se jo ab kahūñ un ko pā rahā huuñ

vujūd-e-vāhid hai sirf terā huuñ maiñ fareb-e-nazar mahz ik

jo tujh ko samjhā to phir kahāñ maiñ tū aa gayā hai maiñ jā rahā huuñ

chalā huuñ tanhā muqāble ko in āfatoñ ke in hādsoñ ke

havā ke ruḳh par charāġh rakh kar in āñdhiyoñ meñ jalā rahā huuñ

nisār saaqī ke mai-kade par ki itnā ‘kaif’-o-surūr baḳhshā

karam hai us kā 'atā hai us kī ki pī rahā huuñ pilā rahā huuñ

main KHud tha jab tak bhi sath apne kahin bhi manzil nazar na aai

main kho gaya jab talash mein KHud to yar ko apne pa raha hun

talash kis ki hai kaun gham hai ye sab hijabaat hain nazar ke

juda hi kab the kabhi wo mujh se jo ab kahun un ko pa raha hun

wujud-e-wahid hai sirf tera hun main fareb-e-nazar mahz ek

jo tujh ko samjha to phir kahan main tu aa gaya hai main ja raha hun

chala hun tanha muqable ko in aafaton ke in hadson ke

hawa ke ruKH par charagh rakh kar in aandhiyon mein jala raha hun

nisar saqi ke mai-kade par ki itna ‘kaif’-o-surur baKHsha

karam hai us ka 'ata hai us ki ki pi raha hun pila raha hun