kaisa hi koi ho nahin kahte pare-pare

kaisā hī koī ho nahīñ kahte pare-pare

khoTe hoñ sikke ke un ke agar hoñ khare-khare

Duube vahī jo apne piyā se bichhaḌ ga.e

jo apne pī ke sañg rahe vo tare-tare

jab se huā nasīb tavāf-e-dar-e-huzūr

rahtī hai mujh se gardish-e-daurāñ pare-pare

jab se nigāh meñ hare gumbad kā hai jamāl

rahte haiñ Daal naḳhl-e-talab ke hare-hare

ye kūcha-e-habīb hai sehn-e-haram nahīñ

ye sar kī jā hai paañv na rakhnā are-are

ham chiiz kyā haiñ aap ḳharīdār hai ḳhudā

bāzār-e-mustafā ke haiñ saude khare-khare

jo nuur aur hayāt ke munkir haiñ dekh lo

āñkheñ bujhī-bujhī sī haiñ chehre mare-mare

'sājid' jo munkirīn-e-maqām-e-rasūl haiñ

do bol tū bhī un ko sunā de khare-khare

kaisa hi koi ho nahin kahte pare-pare

khoTe hon sikke ke un ke agar hon khare-khare

Dube wahi jo apne piya se bichhaD gae

jo apne pi ke sang rahe wo tare-tare

jab se hua nasib tawaf-e-dar-e-huzur

rahti hai mujh se gardish-e-dauran pare-pare

jab se nigah mein hare gumbad ka hai jamal

rahte hain Dal naKHl-e-talab ke hare-hare

ye kucha-e-habib hai sehn-e-haram nahin

ye sar ki ja hai panw na rakhna are-are

hum chiz kya hain aap KHaridar hai KHuda

bazar-e-mustafa ke hain saude khare-khare

jo nur aur hayat ke munkir hain dekh lo

aankhen bujhi-bujhi si hain chehre mare-mare

'sajid' jo munkirin-e-maqam-e-rasul hain

do bol tu bhi un ko suna de khare-khare