har ek etibar se aaj tak hun faqat fareb-e-KHayal mein

har ik e'tibār se aaj tak huuñ faqat fareb-e-ḳhayāl meñ

mirī zindagī kā shumār hai na firāq meñ na visāl meñ

vo hasīñ har ek adā hasīñ magar itnī sab ko nazar nahīñ

koī ruup shān-e-jamāl meñ koī ruup shān-e-jalāl meñ

nahīñ jis pe ishq kā kuchh asar bhalā us kī husn pe kyā nazar

use kyā basañt kī ho ḳhabar jo rañgā na jaaye gulāl meñ

hue husn-o-ishq jo dū-badū rahī do diloñ kī ik aarzū

kabhī us ke ġhamza-e-shokH meñ kabhī mere chashm-e-savāl meñ

mirā yaar mujh se judā kahāñ hai vahī ayaañ hai vahī nihāñ

mere dil ke saath mirī zabāñ vahī qaal meñ vahī haal meñ

mire ġhaur-o-fikr ke zāviyoñ pe haiñ pahre aise lage hue

ye majāl hai ki tire sivā koī aa to jaaye ḳhayāl meñ

ye vahī hai 'kāmil'-e-bā-vafā ki jahāñ kahīñ bhī rahā rahā

tire zikr meñ tirī fikr meñ tirī dhun meñ tere ḳhayāl meñ

har ek e'tibar se aaj tak hun faqat fareb-e-KHayal mein

meri zindagi ka shumar hai na firaq mein na visal mein

wo hasin har ek ada hasin magar itni sab ko nazar nahin

koi rup shan-e-jamal mein koi rup shan-e-jalal mein

nahin jis pe ishq ka kuchh asar bhala us ki husn pe kya nazar

use kya basant ki ho KHabar jo ranga na jaye gulal mein

hue husn-o-ishq jo du-badu rahi do dilon ki ek aarzu

kabhi us ke ghamza-e-shokH mein kabhi mere chashm-e-sawal mein

mera yar mujh se juda kahan hai wahi ayan hai wahi nihan

mere dil ke sath meri zaban wahi qal mein wahi haal mein

mere ghaur-o-fikr ke zawiyon pe hain pahre aise lage hue

ye majal hai ki tere siwa koi aa to jaye KHayal mein

ye wahi hai 'kaamil'-e-ba-wafa ki jahan kahin bhi raha raha

tere zikr mein teri fikr mein teri dhun mein tere KHayal mein