kaun baiTha hai ab andesha-e-farda le kar

kaun baiThā hai ab andesha-e-fardā le kar

mutma.in huuñ tirī nisbat kā sahārā le kar

apnī qudrat ke tamāshe kabhī dikhlāte haiñ

'abd-e-qādir ke musammā kā vo pardā le kar

jānñe vaalī nigāhoñ ne mujhe jaan liyā

kho gayā maiñ jo kabhī naam kisī kā le kar

dāġh-e-dil zaḳhm-e-jigar dīda-e-kHūn-nāb-fishāñ

ham bhī aa.e haiñ dar-e-yār se kyā kyā le kar

shikva-sanjī ye maze kī hai ki ham dar se tire

aa.e haiñ tañgī-e-dāman hī kā shikvā le kar

har musībat se har ik fikr se har aafat se

chhuT ga.e ham to faqat naam tumhārā le kar

kis pe ehsāñ shah-e-jīlāñ kā nahīñ hai 'kāmil'

palte aa.e haiñ sabhī unkā utārā le kar

kaun baiTha hai ab andesha-e-farda le kar

mutmain hun teri nisbat ka sahaara le kar

apni qudrat ke tamashe kabhi dikhlate hain

'abd-e-qadir ke musamma ka wo parda le kar

jaanne wali nigahon ne mujhe jaan liya

kho gaya main jo kabhi nam kisi ka le kar

dagh-e-dil zaKHm-e-jigar dida-e-kHun-nab-fishan

hum bhi aae hain dar-e-yar se kya kya le kar

shikwa-sanji ye maze ki hai ki hum dar se tere

aae hain tangi-e-daman hi ka shikwa le kar

har musibat se har ek fikr se har aafat se

chhuT gae hum to faqat nam tumhaara le kar

kis pe ehsan shah-e-jilan ka nahin hai 'kaamil'

palte aae hain sabhi unka utara le kar