wahi kuchh husn ke jalwon ka pura lutf pate hain

vahī kuchh husn ke jalvoñ kā puurā lutf paate haiñ

jo apne dil ko ḳhud ik mustaqil kā'ba banāte haiñ

vo aate jaate jab sāz-e-nafas ko chheḌ jaate haiñ

mire ajzā-e-hastī sab unhīñ ke giit gaate haiñ

mohabbat ho agar sachchī to aise din bhī aate haiñ

vo apne nāz-bardāroñ ke ḳhud bhī naaz uThāte haiñ

ḳhabar us vaqt hotī hai vo jab nāvik lagāte haiñ

nishāna koī ho jis ko uḌānā huā uḌāte haiñ

mohabbat ke khilāḌī haar kar bhī jiit jaate haiñ

vo itnā jaan kar hī jaan kī baazī lagāte haiñ

jo us par mar-miTe un se hazāroñ faiz paate haiñ

unheñ murda na samjho vo to mardoñ ko jalāte haiñ

nazar hadd-e-ta'ayyun se jahāñ aage nahīñ baḌhtī

vahāñ kuchh husn ke be-qaid jalve muskurāte haiñ

hameñ vo bhuul jaa.eñ to gila kyā bhuul jaane kā

jab un kī yaad meñ apne ko ham ḳhud bhuul jaate haiñ

kafan meñ muñh chhupānā husn se ik chheḌ hai goyā

jo ham se muñh chhupāte the ham un se muñh chhupāte haiñ

ta'ajjub kyā agar be-nūr hoñ āñkheñ za’īfī meñ

sahar jab hone aatī hai sitāre jhilmilāte haiñ

ye mujh par tohmat-e-hastī nahīñ to aur phir kyā hai

haqīqat se jo kore haiñ vo be-par kī uḌāte haiñ

vujūd ġhair vahmī hī sahī mash.hūd ho kyuuñ kar

nazar ke zāviyoñ par tak to vo pahre biThāte haiñ

sharāb-e-'abadiyat har piine vaale ko nahīñ pachtī

ye vo mai hai ki jis ko zarf vaale hī pachāte haiñ

asar ho yā na ho nāloñ kā lekin ye bhī kyā kam hai

kisī 'unvāñ vo merā dard-e-dil kuchh sun to paate haiñ

kabhī kuchh is tarah āvāz aa jaatī hai kānoñ meñ

vo jaise paas hī maddham suroñ meñ gungunāte haiñ

sahārā mil gayā hai jab se un kī dast-gīrī kā

qadam dānista laġhzish se bhī aksar Dagmagāte haiñ

kahe detī haiñ nazreñ hāl-e-dil āñkhoñ hī āñkhoñ meñ

chhupā.ūñ laakh lekin dil ke goshe khul hī jaate haiñ

mire bas kī nahīñ tark-e-mohabbat kyā karūñ nāseh

maiñ jitnā bhūlnā chāhūñ vo utnā yaad aate haiñ

namak parvarda-e-husn-e-malīh-e-yār huuñ 'kāmil'

usī nisbat se dil ke zaḳhm saare muskurāte haiñ

wahi kuchh husn ke jalwon ka pura lutf pate hain

jo apne dil ko KHud ek mustaqil ka'ba banate hain

wo aate jate jab saz-e-nafas ko chheD jate hain

mere ajza-e-hasti sab unhin ke git gate hain

mohabbat ho agar sachchi to aise din bhi aate hain

wo apne naz-bardaron ke KHud bhi naz uThate hain

KHabar us waqt hoti hai wo jab nawik lagate hain

nishana koi ho jis ko uDana hua uDate hain

mohabbat ke khilaDi haar kar bhi jit jate hain

wo itna jaan kar hi jaan ki bazi lagate hain

jo us par mar-miTe un se hazaron faiz pate hain

unhen murda na samjho wo to mardon ko jalate hain

nazar hadd-e-ta'ayyun se jahan aage nahin baDhti

wahan kuchh husn ke be-qaid jalwe muskuraate hain

hamein wo bhul jaen to gila kya bhul jaane ka

jab un ki yaad mein apne ko hum KHud bhul jate hain

kafan mein munh chhupana husn se ek chheD hai goya

jo hum se munh chhupate the hum un se munh chhupate hain

ta'ajjub kya agar be-nur hon aankhen za’ifi mein

sahar jab hone aati hai sitare jhilmilate hain

ye mujh par tohmat-e-hasti nahin to aur phir kya hai

haqiqat se jo kore hain wo be-par ki uDate hain

wujud ghair wahmi hi sahi mashhud ho kyun kar

nazar ke zawiyon par tak to wo pahre biThate hain

sharab-e-'abadiyat har pine wale ko nahin pachti

ye wo mai hai ki jis ko zarf wale hi pachate hain

asar ho ya na ho nalon ka lekin ye bhi kya kam hai

kisi 'unwan wo mera dard-e-dil kuchh sun to pate hain

kabhi kuchh is tarah aawaz aa jati hai kanon mein

wo jaise pas hi maddham suron mein gungunate hain

sahaara mil gaya hai jab se un ki dast-giri ka

qadam danista laghzish se bhi aksar Dagmagate hain

kahe deti hain nazren haal-e-dil aankhon hi aankhon mein

chhupaun lakh lekin dil ke goshe khul hi jate hain

mere bas ki nahin tark-e-mohabbat kya karun naseh

main jitna bhulna chahun wo utna yaad aate hain

namak parwarda-e-husn-e-malih-e-yar hun 'kaamil'

usi nisbat se dil ke zaKHm sare muskuraate hain