hamare KHake uDa-uDa kar wo apna naqsha jama rahe hain

hamāre ḳhāke uḌā-uḌā kar vo apnā naqsha jamā rahe haiñ

majāl kis kī jo un se pūchhe huzūr ye kyā banā rahe haiñ

mohabbat aisī burī balā hai fareb-e-nazzāra khā rahe haiñ

ham un ke dhokoñ ko jaan kar bhī phir un ke dhoke meñ aa rahe haiñ

na.e-na.e daaġh de ke dil ko na.e-na.e gul khilā rahe haiñ

ġharīb 'āshiq kā daḳhl hī kyā vo apne ghar ko sajā rahe haiñ

vo ham pe mashq-e-sitam se apne hamārā dil aazmā rahe haiñ

karam kā masdar bane hue haiñ sitam kā markaz banā rahe haiñ

hamārā kyā haal pūchhte ho taḌap rahe tilmilā rahe haiñ

nafas-nafas soz-e-mustaqil hai maze mohabbat ke aa rahe haiñ

vahī nigāhoñ meñ bas rahe haiñ vahī tasavvur pe chhā rahe haiñ

khulī hoñ yā band merī āñkheñ vahī khaḌe muskurā rahe haiñ

nazar uThāte haiñ jis taraf bhī vahī nazar ham ko aa rahe haiñ

vajūd har shai hai jin ke dam se unhīñ ko har shai meñ pā rahe haiñ

mujassam ik sher-o-naġhma ban kar jo zer-e-lab gungunā rahe haiñ

vahī haiñ fikr-o-nazar kā markaz unhīñ ke ham giit gā rahe haiñ

hai jis se merī hayāt raushan nahīñ nahīñ kā.ināt raushan

vahī to hai sham'-e-bazm-e-'ālam usī se ham lau lagā rahe haiñ

diyā hai dam jis kī har adā par maiñ jis se majbūr huuñ vafā par

janāb-e-vā'iz mujhe usī se ḳhabar nahīñ kyuuñ Darā rahe haiñ

kisī kī ye shoḳhiyāñ to dekho ye ham se hamdardiyāñ to dekho

ye jo aag dil meñ dabī huī thī use havā de ke jā rahe haiñ

ye kyuuñ saverā sā ho chalā hai naqāb kis ne ulaT diyā hai

ye chāñd kyuuñ paḌ gayā hai phīkā sitāre kyuuñ jhilmilā rahe haiñ

ḳhabar nahīñ kis ne fat.h paa.ī shikast hisse meñ kis ke aa.ī

hamārī duniyā-e-dil badal kar vo jaane kyuuñ muskurā rahe haiñ

vahī to maqsūd dil haiñ 'kāmil' vahī to haiñ zindagī kā hāsil

vo merī duniyā-e-ārzū meñ sharīk har mudda'ā rahe haiñ

hamare KHake uDa-uDa kar wo apna naqsha jama rahe hain

majal kis ki jo un se puchhe huzur ye kya bana rahe hain

mohabbat aisi buri bala hai fareb-e-nazzara kha rahe hain

hum un ke dhokon ko jaan kar bhi phir un ke dhoke mein aa rahe hain

nae-nae dagh de ke dil ko nae-nae gul khila rahe hain

gharib 'ashiq ka daKHl hi kya wo apne ghar ko saja rahe hain

wo hum pe mashq-e-sitam se apne hamara dil aazma rahe hain

karam ka masdar bane hue hain sitam ka markaz bana rahe hain

hamara kya haal puchhte ho taDap rahe tilmila rahe hain

nafas-nafas soz-e-mustaqil hai maze mohabbat ke aa rahe hain

wahi nigahon mein bas rahe hain wahi tasawwur pe chha rahe hain

khuli hon ya band meri aankhen wahi khaDe muskura rahe hain

nazar uThate hain jis taraf bhi wahi nazar hum ko aa rahe hain

wajud har shai hai jin ke dam se unhin ko har shai mein pa rahe hain

mujassam ek sher-o-naghma ban kar jo zer-e-lab gunguna rahe hain

wahi hain fikr-o-nazar ka markaz unhin ke hum git ga rahe hain

hai jis se meri hayat raushan nahin nahin kainat raushan

wahi to hai sham'-e-bazm-e-'alam usi se hum lau laga rahe hain

diya hai dam jis ki har ada par main jis se majbur hun wafa par

janab-e-wa'iz mujhe usi se KHabar nahin kyun Dara rahe hain

kisi ki ye shoKHiyan to dekho ye hum se hamdardiyan to dekho

ye jo aag dil mein dabi hui thi use hawa de ke ja rahe hain

ye kyun sawera sa ho chala hai naqab kis ne ulaT diya hai

ye chand kyun paD gaya hai phika sitare kyun jhilmila rahe hain

KHabar nahin kis ne fath pai shikast hisse mein kis ke aai

hamari duniya-e-dil badal kar wo jaane kyun muskura rahe hain

wahi to maqsud dil hain 'kaamil' wahi to hain zindagi ka hasil

wo meri duniya-e-arzu mein sharik har mudda'a rahe hain